«MoonAI»
Byltyr OpenAI «GPT-4o» modelin tanystyrǵannan keıin, jasandy ıntellektini is júzinde qoldanyp kórgen Ashat Adhamov bul tehnologııanyń álemdi túbegeıli ózgertetinine kózi jetken. Sol kezeńde týrlardy uıymdastyrýmen aınalysyp júrgen ol, kóptep túsetin ótinishterdi jedel óńdeý múmkin emestigin baıqaıdy. Osy máseleni sheshý maqsatynda Ashat táýlik boıy jumys isteıtin, suranystarǵa avtomatty túrde jaýap berip, qajetti ótinishterdi irikteı alatyn JI-agent jasaıdy. Keıin dál sondaı sheshimdi ol basqa kompanııalarǵa da usynyp, jaqsy nátıje alǵannan soń 2024 jyldyń ortasynda «MoonAI» jobasyna tolyqtaı kirisken.
Ashattyń aıtýynsha, bıznestegi eń ózekti máseleniń biri – klıent ótinishteriniń jaýapsyz qalýy.
– Bastapqyda biz barlyq bızneske tán úlken máseleni, ıaǵnı ótinishterdiń jaýapsyz qalýy, sonyń saldarynan
klıent joǵaltý máselesin sheshýge kiristik. Mysaly, bizdiń tapsyrys berýshilerdiń biri Mekkege qajylyq uıymdastyratyn kompanııa bolatyn. Keıin belgili bolǵandaı, olarǵa ótinishterdiń kóp bóligi tańǵy saǵat 3-4 shamasynda túsedi eken. Dál sol kezde adamdardyń Mekkege barý nıeti oıanady. Eger ótinishke sol sátte jaýap bermese, kúndiz adam oıyn ózgertip nemese umytyp ketýi múmkin. Kópshilik: «Maǵan tez jaýap berdi, demek bul kompanııaǵa senýge bolady» dep oılaıdy, – deıdi joba jetekshisi.
Degenmen mundaı fýnksııalardy usynatyn bottar búginde kóp. Biraq «MoonAI» agentteriniń basty ereksheligi – tereń ıntegrasııa. Ashattyń sózine qaraǵanda, ózge kompanııalardyń sheshimderi test kezinde tamasha kóringenimen, shynaıy ómirde durys nátıje bermeıdi. Sebebi adamdar ártúrli jazady, ıaǵnı dıalekt qoldanady, qate jiberedi, aýdıo nemese faıl júkteıdi, birneshe tildi aralastyrady. JI mundaıda shatasyp, qarapaıym suraqtarǵa jaýap bere almaı qalady.
Osy kúnge deıin «MoonAI»-men 160-qa jýyq kompanııa jumys istep úlgergen. Qazirgi ýaqytta komandada 19 maman bar.
«Vetra AI»
Jasandy ıntellekt naryǵynda jumys ónimdiligin arttyrýǵa arnalǵan sheshimder kún saıyn kóbeıip keledi. Solardyń ishinde jas startaper Damır Ysqaqov qurǵan «Vetra AI» erekshe kózge túsip otyr. Bar bolǵany 18 jastaǵy Damır operatorlyq tapsyrmalardy avtomattandyratyn júıe jasap, «Google» men «OpenAI»-dan 200 myń dollardan astam grant utyp aldy.
«Vetra AI» – habarlamalardy, faıldardy jáne daýystyq jazbalardy avtomatty túrde tapsyrmaǵa, kezdesýge jáne eskertpege aınaldyryp, kúntizbemen sınhrondaıtyn jasandy ıntellekt negizindegi kómekshi.
Joba avtorynyń aıtýynsha, qazirgi tańda negizgi qıyndyq – aqparattyń tym kóptigi.
– Bul ıdeıa bıyl naýryz aıynda óz basymnan ótken qıyndyqtan týdy. Kún saıyn jınalyp qalatyn tapsyrmalar, dedlaındar, hat-habarlar, Zoom kezdesýler, siltemeler men daýystyq habarlamalar kóbeıgeni sonshalyq, jospar qurýdyń ózine biraz ýaqyt ketetin boldy. Sol kezde osyǵan naqty qansha ýaqytym jumsalatynyn eseptep kórdim de, ózim tańǵaldym. Aptasyna 5-7 saǵat tek josparlaýǵa ketedi eken. Al menedjerlerde bul kórsetkish tipti jumys ýaqytynyń 20%-yna deıin barady. Osyny kórgen soń, bul úderisti avtomattandyrýǵa bolatynyn túsindim. Sóıtip, túsetin aqparatty ózi taldap, rettep otyratyn jasandy ıntellektige negizdelgen kómekshi jasaý ıdeıasy paıda boldy, – deıdi D.Ysqaqov.
Damır startapty Telegram arqyly iske qosqan. О́ıtkeni kóptegen qoldanýshyǵa bólek qosymshany júkteý yńǵaısyz, al messendjer – kúndelikti qoldanatyn qural.
Búginde startaptyń alǵashqy qoldanýshylary – frılanserler, stýdentter jáne shaǵyn bıznes ókilderi. Kompanııa aıyna 15 dollarlyq jazylym usynady. Komanda jaqyn ýaqytta veb-nusqasyn iske qosyp, halyqaralyq naryqqa shyǵýdy josparlap otyr.
