Foto: freepik.com
«Baǵa qalyptastyrýdyń jańartylǵan tetigin engizý baǵanyń ashyqtyǵyn jáne dári-dármek qunynyń boljamdylyǵyn arttyrýǵa baǵyttalǵan», dep naqtylady mınıstrlik.
Qazirgi ýaqytta 4 994 saýdalyq ataýdaǵy dári-dármekke shekti baǵalar bekitilgen. Al taǵy 1 707 reseptisiz satylatyn preparat naryqtyq baǵamen saýdalanǵanymen, ýákiletti organnyń baqylaýynda qalady.
Baǵa monıtorıngi
2025 jyly Medısınalyq jáne farmasevtıkalyq baqylaý komıteti elimizdiń 20 óńirinde dári-dármek baǵasyna monıtorıng júrgizgen.
Zertteý aıasynda suranysy joǵary 5 farmakologııalyq topqa jatatyn 50 dári túri qarastyryldy:
vırýsqa qarsy,
qabynýǵa qarsy,
bakterııaǵa qarsy,
júrek-qan tamyr júıesine arnalǵan,
asqazan-ishek aýrýlaryn emdeýge arnalǵan dáriler.
«Taldaý nátıjesi boıynsha qyrkúıekte maýsymmen salystyrǵanda dárilerdiń 34 paıyzynyń (orta eseppen 7,8%) baǵasy tómendegen, al qazanda – 50 paıyzynyń (orta eseppen 11,1%) arzandaýy baıqaldy», delingen mınıstrliktiń habarlamasynda.
Azamattar dári-dármek satý kezinde baǵa buzýshylyqtaryn DariKZ jáne Naqty Onim mobıldi qosymshalary arqyly nemese komıtettiń óńirlik departamentterine júginý arqyly habarlaı alady.
Aıta ketelik, qazan aıynyń sońynda Densaýlyq saqtaý mınıstrligi keıbir dáriler men medısınalyq qyzmetterdi qosylǵan qun salyǵynan (QQS) bosatýdy usynǵan bolatyn. Tıisti qaýly jobasy «Ashyq NQA» portalynda jarııalanǵan.
