Foto: Ashyq derekkóz
Májilis otyrysynda depýtat Tilektes Adambekov el azamattaryn alańdatqan suraqty kóterip, tutynýshylyq jáne ıpotekalyq nesıelerdiń qashan arzandaıtynyn surady. Mádına Ábilqasymova bul baǵytta naqty jumystar júrgizilip jatqanyn aıtty. Onyń sózinshe, sońǵy eki jylda agenttik nesıelik mólsherlemelerdi tómendetý úshin zańnamalyq jáne retteýshi ózgerister engizgen.
«О́tken jyly qabyldanǵan zańnan keıin biz tutynýshylyq nesıelerdiń mólsherlemesin 56 paıyzdan 46 paıyzǵa, ıpotekalyq nesıelerdi 30 paıyzdan 25 paıyzǵa deıin tómendettik. Al kepilsiz nesıeler boıynsha mólsherleme 45 paıyz deńgeıinde bekitildi», dedi ol.
Ábilqasymovanyń aıtýynsha, 2025 jyly ıpotekalyq nesıelerdiń paıyzdyq mólsherlemesin 20 paıyzǵa deıin túsirý múmkin bolǵan. Alaıda Ulttyq bank bazalyq mólsherlemeni 18 paıyzǵa deıin kótergen soń, keıbir bankter ıpotekalyq ónimderdi ýaqytsha toqtatýǵa májbúr bolǵan.
Sondyqtan QNRDA ıpotekalyq mólsherlemelerdi tómendetý týraly normany 2026 jyldyń 1 shildesine deıin uzartty. Osy ýaqytqa deıin agenttik Ulttyq bankpen birlesip jańa esepteý ádistemesin ázirleıdi. Jańa júıe bazalyq mólsherlememen tikeleı baılanystyrylyp, naryqtaǵy ózgeristerge ıkemdi bolmaq.
«Qazir tutynýshylyq nesıelerdiń ortasha mólsherlemesi 35–36 paıyz shamasynda. Biz jańa ádistemeniń osy deńgeıden aspaıtynyna senemiz. Sonymen qatar, naryqtaǵy báseke kúsheıgen saıyn mólsherlemeler odan ári tómendeýi múmkin», dedi Mádına Ábilqasymova.
