Bórli aýdanynda taǵy 15 turǵyn jylyjaı salýǵa grant utyp alyp, «Batys AgroHub» jobasynyń ekinshi legine qosyldy. Jeńimpazdardyń basym bóligi – Aqsaı men Pýgachıovo aýyldarynyń turǵyndary, sondaı-aq Qyzyltal, Araltal, Aqsý jáne Bórli eldi mekenderinen de bar.
«Batys AgroHub» jobasy 2024 jylǵy qarashada Qarashyǵanaq Petroleým Opereıtıng B.V konsorsıýmynyń aksıonerleri – «Shell Qazaqstan» men «Enı» kompanııalarynyń qoldaýymen bastalǵan edi. Jobany Ortalyq Azııanyń Eýrazııa qory men Almaty oblysyndaǵy Eńbekshiqazaq aýdandyq qoǵamdyq qory birlesip júzege asyryp jatyr. Bul jobanyń maqsaty – Bórli aýdany turǵyndaryna jylyjaı sharýashylyǵyn damytýǵa kómektesý, otbasylardyń tabysyn arttyrý jáne óńirdiń azyq-túlik qaýipsizdigin nyǵaıtý.
Jobaǵa qatysýshylarǵa tájirıbeli agronomdar men keńesshiler kómek kórsetedi. Olar jylyjaı isin júrgizý, ónimdi satý jáne marketıng máselesin úıretip qana qoımaı, bıznes-jospar qurýǵa kómektesedi. Basqa óńirlerge issa-par uıymdastyryp, tájirıbe almastyrady. Bıyl kóktemde bórlilik alǵashqy on turǵyn óz jylyjaıyn salyp, «Batys Agroónim» brendimen kókónis sata bastady. О́tken jazda olar Almaty oblysyna baryp, áriptesterinen jańa tájirıbe aldy.
«Batys AgroHub» jobasynyń ekinshi legine qyzyǵýshylyq joǵary boldy. Uıymdastyrýshylardyń aıtýynsha, 100-den astam adamnan ótinish túsken. Baıqaý qorytyndysynda eki kúndik ıntensıv tájirıbe men sarapshylardyń onlaın-oqýynan ótken 15 qatysýshy irikteldi. Qazylar alqasy bıylǵy daıyndyq deńgeıi óte joǵary dep otyr. Jobaǵa qatysýǵa nıet bildirgen úmitkerlerdiń birazy jylyjaı isinde qandaı da bir tájirıbeden ótken eken. Al bul – tabys kepili bolary anyq.
Búginde osy jobanyń arqasynda óńirde jylyjaı isimen aınalysatyn jandar jyl saıyn kóbeıip keledi. Bul Bórli aýdany turǵyndaryna mol ónim alyp, týǵan jerde óz áleýetin júzege asyrýǵa jańa múmkindik beredi.
Batys Qazaqstan oblysy
