Saýda jáne ıntegrasııa mınıstrliginiń málimetinshe, memlekettik retteý aıasyndaǵy 19 áleýmettik mańyzy bar azyq-túlik taýarynyń baǵasy turaqty deńgeıde qalyp otyr. Kúzdiń basynan beri olardyń ındeksi shamaly ǵana ózgergen: tamyzda – 0%, qyrkúıekte – 0,2%, qazanda – 0,2%.
Baǵanyń turaqtylyǵyn saqtaý úshin otandyq óndirýshiler men saýda jelilerimen tikeleı ózara is-qımyl jolǵa qoıylǵan. Apta saıyn baǵa monıtorıngi júrgizilip, saýda ústemeaqylarynyń shekti mólsherin saqtaý qatań baqylanady. Qazan aıynda 400-den astam aýyl sharýashylyǵy jármeńkesi uıymdastyrylyp, sonyń ishinde «Bereke Fest» jáne «Republic Day» aksııalary otandyq ónimderdiń qoljetimdiligin arttyrýǵa jáne baǵanyń ósýin tejeýge yqpal etti.
Keńes barysynda azyq-túlik ınflıasııasyna áser etetin negizgi faktorlar qarastyryldy. Memlekettik retteýge kirmeıtin, biraq tutyný sebetine enetin 160-tan astam azyq-túlik taýarynyń baǵasyn turaqtandyrý sharalary jeke talqylandy.
Sonymen qatar ónimniń ózindik qunyn tómendetý máseleleri kóterildi. Bul baǵytta jemshóp bazasyn damytý jáne negizgi shıkizat túrleri — shıki sút, kúnbaǵys tuqymy men dándi daqyldar baǵasyn turaqtandyrý tetikteri aıtyldy.
Bólshek saýdadaǵy baǵa ósimin tejeý jáne naryqtaǵy boljamdylyqty saqtaý maqsatynda iri óndirýshiler men ımporttaýshylarmen erikti túrde baǵa belgileý jóninde kelisimder jasaý usynyldy.
«Aýyl sharýashylyǵy sýbektilerin sýbsıdııalaý qaǵıdalaryna óndirilgen ónimniń keminde 50 paıyzyn ishki naryqta ótkizý talaby engizilmek. Bul qadam ishki naryqty otandyq ári qoljetimdi ónimdermen tolyqtyrýǵa jáne azyq-túlik qaýipsizdigin arttyrýǵa múmkindik beredi, delingen habarlamada.
Keńeske qatysýshylar sondaı-aq saqtaý júıesiniń tıimdiligin arttyrý máselesin talqylap, Ázirbaıjan, О́zbekstan, Tájikstan, Qyrǵyzstan jáne Túrikmenstannan jemis-jıdek pen kókónis jetkizý úshin «jasyl dáliz» tetigin engizý bastamasyn qoldady. Bul maýsymdyq baǵa aýytqýlaryn azaıtyp, jańa ónimderdiń úzdiksiz jetkizilýin qamtamasyz etedi.
Sondaı-aq jekelegen taýar naryqtarynda baǵanyń kúrt teńgerimsizdigi nemese alypsatarlyq belgileri baıqalǵan jaǵdaıda, monopolııaǵa qarsy organnyń ýaqytsha baǵa turaqtandyrý sharalaryn engizý múmkindigi talqylandy.
Áleýmettik mańyzy bar jáne basqa da azyq-túlik taýarlarynyń baǵasyn turaqtandyrý jumysy vedomstvolar arasyndaǵy ózara is-qımyldy kúsheıtý jáne naryqtaǵy jaǵdaıdy turaqty baqylaý arqyly jalǵasady
