Olımpıadany uıymdastyrýda 1100 alamnı jáne IQanat volonterleri – túlekter, mektep oqýshylary jáne ótken jyldardaǵy fınalıster mańyzdy ról oınady. Olar tirkeý jumystaryna kómektesip, qatysýshylardy qarsy aldy, oqýshylardyń kóshirip jazbaýyn qadaǵalap, balalardy óz kúshine senýge umtyldyratyn qoldaý men senimdilik atmosferasyn qalyptastyrdy. Bul – jobanyń «giving back» qaǵıdasymen úndesip jatyr. Onyń aıasynda jobanyń burynǵy qatysýshylary jas úmitkerlerge óz jolyn júrip ótýge kómektesedi.
Jobanyń ár jyldardaǵy qatysýshylarynyń arasyndaǵy baılanys – IQanat-tyń eń qundy dástúrleriniń biri. Túrkistan oblysy Sholaqqorǵan aýylynda týǵan aǵaıyndy Sultanmurattardyń oqıǵasy sonyń jarqyn mysaly bola alady.
Aǵaıyndylardyń kishisi Qazbek Y. Altynsarın atyndaǵy aýyl mektebiniń 8-synybynda oqıdy jáne bıyl Olımpıadaǵa qatysyp jatyr. Ol bilim saıysyna aǵasyna eliktep qosylyp, onyń izin basýdy uıǵardy. Aǵasy Jaqsylyq ótken jyly Olımpıadanyń úsh týrynan da sátti ótip, top-100 jeńimpazdyń qataryna ilindi de, Býrabaıdaǵy IQanat mektep-pansıonatynda oqýǵa grant jeńip aldy. Qazir ol úzdik halyqaralyq baǵdarlamalar boıynsha 10-synypta bilim alyp jatyr. Bul – aǵaıyndylardyń otbasy úshin úlken kómek, óıtkeni, balalardyń mekteptegi oqý, jatyn jáne ózge de shyǵyndaryn IQanat jobasynyń qamqorshysy bolǵan kásipkerler óz moınyna alady.
«Qazir aǵam IQanat-ta oqıdy, biz jıi habarlasyp turamyz. Ol sabaqtyń qalaı keremet ótetinin, mekteptiń kól jaǵasyndaǵy ormanda ornalasqanyn, jıi seıilge shyǵatyndaryn jáne muǵalimder men synyptastary týraly kóp áńgimeleıdi. Bul meni de qatty yntalandyrady. Oǵan qosa, aǵam meniń oqýyma kómektesip, aqyl-keńesin aıamaıdy. Tipti, Olımpıadanyń I týryna daıyndalýǵa da kómektesti. Buryn biz birge turyp, birge ósken edik, aǵammen qaıta birge bolý – men úshin IQanat-qa túsýge shabyt beretin sebepterdiń biri», – deıdi Qazbek Sultanmurat.
Mundaı otbasylardaǵy balalar úshin aýyldaǵy ómirdiń beretin múmkindikteri kóp emes: repetıtor da, úıirmeler de, keremet mektepter de joq. Olarda bary – bir-biriniń qoldaýy men ómirdegi úlken maqsattarǵa jetýdi kózdeıtin arman ǵana. Sondyqtan, IQanat Olımpıadasy syılaıtyn múmkindik aıryqsha mańyzdy: ol balalarǵa ózin kórsetip, óz ómiriniń traektorııasyn ózgertýge kómektesedi. 
Olımpıadanyń úsh týrynan da sátti ótken jeńimpazdar mesenattardyń esebinen Býrabaıdaǵy IQanat mektep-pansıonatynda oqı alady nemese olımpıadadan keıingi úsh jyldyq súıemeldeý baǵdarlamasyna qabyldanady. Munda balalardy UBT jáne halyqaralyq emtıhandarǵa daıyndaıdy, aǵylshyn tilin tereńdetip oqytyp, IT, kásipkerlik jáne zamanaýı soft skills daǵdylaryn damytady. Munyń bári jaqsy joǵary oqý ornyna túsýge daıyndalýǵa kómektesedi.
Búginde IQanat – aýyl balalarynyń óz áleýetin ashyp, damytýyna kómektesetin maqsaty bir 240 kásipkerdiń qaýymdastyǵy. Jobanyń arqasynda IQanat túlekteriniń 94%-y Qazaqstan men sheteldiń úzdik joǵary oqý oryndaryna grant negizinde túsip, búginde álemniń 19 elinde bilim alyp jatyr. Olar – arman men jiger kez-kelgen jaǵdaıdan da kúshti ekeniniń jarqyn dáleli.
