Mılan qalasynyń «Djýzeppe Meassa» stadıonynda ótken oıyn 2:1 esebimen alań ıeleriniń paıdasyna sheshildi. 45-mınýtta «Interdiń» fýtbolshysy Laýtaro Martınes esep ashty. Ekinshi taımda da mılandyqtar ábden qyspaqqa aldy. Qaqpashy Temirlan Anarbekov birneshe soqqyny sátti qaıtardy. Qorǵanystaǵy oıynshylar da abdyraǵan joq, qarsylastyń shabýylynan barynsha qorǵana bildi. 55-mınýtta komanda kapıtany Ofrı Arad tarazy basyn teńestirdi. Izraıldik legıoner Chempıondar lıgasynyń jalpy kezeńinde ótkizgen matchtarynda gol soqtyrmaı kele jatqan «Interdiń» qaqpasynan sańylaý tapty. Degenmen kóp uzamaı, 67-mınýtta Karlos Aýgýsto komandasyna jeńis golyn tartý etti.
«Qaırattyń» bas bapkeri Rafael Ýrazbahtın «Interge» qarsy oıynnan keıin pikirin bildirdi.
– Biz álemniń úzdik klýbtarynyń birine laıyqty qarsylyq tanyttyq. Olar ótken maýsymda Chempıondar lıgasynyń fınalynda súrindi. О́te tegeýrindi ujymnyń shabýylyna tótep berdik. Kelesi matchty da syrt alańda ótkizemiz. Oǵan deıin úsh aptadaı ýaqyt bar. Jigitter tynyǵyp, jaraqatynan aıyǵyp komandaǵa kúsh qosady, – dedi bas bapker.
«Qaırat» buǵan deıin Portýgalııanyń «Sportıng» komandasynan, Ispanııanyń «Real Madrıd» klýbynan iri eseppen jeńildi. Kıprdiń «Pafos» klýbymen teń tústi. Alda áli tórt match bar. 26 qarashada Danııada «Kopengagen» klýbyna qarsy oınaıdy, 9 jeltoqsanda óz alańynda Grekııanyń «Olımpıakos» oıynshylarymen
tartysqa túsedi. Kelesi jyldyń 20 qańtarynda Belgııanyń «Brıýgge» klýbyn qabyldaıdy da, 28 qańtarda syrt alańda Anglııanyń «Arsenal» klýbyna qarsy oınaıdy.
