Qustardyń qımylyn qalt jibermeıdi

Onyń fotoǵa túsirýge áýestigine jergilikti tabıǵat janashyry Iýlııa Vahmıstrova ótkizgen ekskýrsııa sebep bolypty. Ekskýrsııaǵa qatysqan ol munaıly óńirdiń tabıǵaty ásem ekenine kóz jetkizgen.

«Biz týǵan jerimizdiń tabıǵatyna mán bermeı júre beremiz. Kún saıy­n torǵaıdy, kógershin men qarǵany jıi kóremiz. О́zge de qustardyń bar ekenine nazar aýdarmaımyz. Qaladaǵy bıik úılerge jaqyndamaıtyn qos qanattylardy kórý úshin tabıǵat aıasyna jıi shyǵatyn boldym», deıdi ol.

Fılıpp Jaıyq ózeniniń jaǵalaýyna jıi barady. О́ıtkeni sý aıdynynyń shahardan tysqary jaǵalaýy qus bazaryna aınalady. Aqqýdy da, qoqıqaz ben aqqutandy da kórýge bolady. Bul onyń qustar álemine qyzyǵýshylyǵyn oıatty.

«Ár adamnyń unatatyn nársesi ártúrli. Bireýler tabıǵat aıasynda serýendeıdi. Keıbiri balyq, ań aýlaıdy. Al men qustardy sýretke túsiremin. О́ıtkeni qustardyń ózindik álemi, minezi bar. Tabıǵattyń qustarsyz sáni bolýy múmkin be? Qos qanattylardy sýretke túsirip, Atyraý tabıǵatynyń ásem ekenin kórsetýdi kózdedim», deıdi F.Syplıonkov.

Áýesqoı fotograftyń aıtýynsha, kez kezgen kórinisti, tipti adamnyń áreketin, ne tabıǵattyń sulýlyǵyn sýretke túsirýdiń ózindik qıyndyǵy bar. Eń bastysy, sheberlik pen tózimdilik qajet.

«Ásirese qustardy sýretke tartý úshin úsh qaǵıdany berik ustanamyn. Bul – saqtyq, shydamdylyq, jedeldik. Saqtyq deıtin sebebim, qustardy úrkitip almaý qajet. Sál sybdyrdy estise, ushyp ketedi. Fotoapparatymdy daıyndap, sátti sýret úshin birneshe mınýt, keıde ornymnan tapjylmaı, saǵattap otyramyn. Qustardyń ár qımylyn qyzyqtaımyn. Qanattylardyń da túrli minezi bar. Biri únemi ushyp-qonyp júredi. Keıbiri qonǵan jerinen qozǵalmaı, demalǵandaı otyrady. Sondaı kezde shydamdy bolýǵa tyrysamyn. Qanatyn qomdaǵan, túrli jándikti tistegen sátin túsirý úshin jedeldik kerek. Balapanyn qorektendirgen sátin qalt jibermeımin», deıdi áýesqoı fotograf.

Ol tabıǵat aıasyna shyǵar aldynda naqty jospar qurmaıdy. Maqsaty – tabıǵatqa súıispenshilikti arttyrý. Bul úshin áleýmettik jelidegi dostaryna ádemi sýret usynady.

«Qustardyń sýretinen kúntizbe ja­saýdy oılastyryp júrmin. Al kór­melerge, ne baıqaýlarǵa qatysýǵa tájirıbe jınaý, sýretke túsirý sheber­li­gimdi shyńdaý qajet. Bálkim, oǵan áli er­teleý shyǵar. Qustardy ǵana sýretke túsirýmen shektelgim kelmeıdi. Al­daǵy ýaqytta dala ańdaryn túsirgim ke­ledi. Túlki, ne qasqyr bóltirikterimen kez­desse, tipti jaqsy bolar edi», deıdi ol.