Sońǵy jıyrma jyldan astam ýaqyt boıy Ulttyq biryńǵaı testileý Qazaqstandaǵy joǵary oqý oryndaryna túsý prosesinde ortalyq júıe rólin atqaryp, barlyq óńirler men áleýmettik toptardaǵy túlekterge joǵary bilimge teń qoljetimdilikti qamtamasyz etip keledi. Endi ETS uıymynyń bilimdi baǵalaý salasyndaǵy jahandyq tájirıbesine súıene otyryp, Ulttyq biryńǵaı testileý formaty jańartylyp, ol tek akademııalyq jetistikterdi ǵana emes, ómir men kásibı qyzmette qajet negizgi daǵdylardy da baǵalaıtyn bolady.
«Bul áriptestik – Qazaqstannyń bolashaǵy úshin mańyzdy betburys. ETS uıymymen birlesip, olardyń bilimdi baǵalaý salasyndaǵy álemdik tájirıbesin engizý arqyly biz jastarymyz úshin jańa múmkindikter ashyp, ózge elderge úlgi bolarlyq baǵyt qalyptastyramyz. Ýnıversıtetter men mekteptermen birlese otyryp, joǵary oqý oryndaryna túsýdiń básekege qabiletti júıesin quryp jatyrmyz», dedi QR Ǵylym jáne joǵary bilim mınıstri.
Bilimdi baǵalaýdyń jańa modelin engizý Qazaqstan úshin birqatar mańyzdy artyqshylyqtar beredi. Daǵdyǵa baǵyttalǵan testilerdi ázirleý qazaqstandyq stýdentterdiń jahandyq ekonomıkada suranysqa ıe quzyretterdi meńgerýine jáne jańa býyndy kásibı turǵydan tabysty iske daıarlaýǵa jaǵdaı jasaıdy. Sonymen birge adam kapıtaly men kásibı daıarlyqtyń halyqaralyq standarttaryna saı qabyldaý júıesin jańartý elimizdiń bilim men ınnovasııa salasyndaǵy kóshbasshylyq ustanymyn nyǵaıtyp, ınvestısııalar men talanttar úshin tartymdylyǵyn arttyrady. Sondaı-aq jańartylǵan UBT formaty barlyq talapkerler úshin ádildik pen teń múmkindikterdi qamtamasyz etpek: ıkemdi test kombınasııalary, biryńǵaı baǵalaý júıesi jáne óńirge, mektepke nemese oqytý tiline táýelsiz birdeı qoljetimdilik qarastyrylǵan.
«ETS óz tájirıbesin baǵalaý salasynda jáne jahandyq kózqarasyn Qazaqstanmen bólisý múmkindigine ıe bolǵanyn maqtan tutady. Bul yntymaqtastyq túrli elderdiń kúsh-jigerin biriktirý arqyly bilim berý sapasyn arttyrýǵa jáne jańa múmkindikter ashýǵa jol ashatynyn kórsetedii», dedi ETS bas dırektory Amıt Sevak.
ETS uıymynyń ınnovasııalyq tásili jasandy ıntellekt, ǵylymı dáldik jáne halyqaralyq bilim almasý qaǵıdattaryna negizdelgen. ETS baǵalaý sapasy men ashyqtyǵyn arttyrýǵa baǵyttalǵan zamanaýı sheshimderdi engizbek. Jasandy ıntellekt tehnologııalaryn – adaptıvti testileý, avtomattandyrylǵan baǵalaý jáne ıntellektýaldy taldaý sııaqty quraldardy qoldaný ádildik pen senimdilikti, sondaı-aq baǵalaý prosesiniń obektıvtiligin qamtamasyz etedi. Barlyq testiler zamanaýı psıhometrııalyq ádister negizinde ázirlenip, olardyń ǵylymı dáldigi men senimdiligine kepildik beredi, ári stýdentter, ýnıversıtetter jáne jumys berýshiler tarapynan halyqaralyq deńgeıde moıyndalmaq.
Sonymen qatar qazaqstandyq mamandardyń ETS zertteý taǵylymdamalaryna qatysýy bilim berý ólshemderi men jasandy ıntellekt salasyndaǵy halyqaralyq yntymaqtastyq pen ortaq ınnovasııalardy damytýǵa yqpal etpek.
QR Ǵylym jáne joǵary bilim mınıstrligi men ETS UBT-ny jańartý stýdentterdiń, oqytýshylardyń jáne ýnıversıtetterdiń el ishinde de, shetelde de qajettilikteri men úmitterine saı bolýyn qamtamasyz etýge nıetti. Reformalardy iske asyrý barysynda taraptar ashyqtyq pen aıqyndyq qaǵıdattaryn ustana otyryp, barlyq múddeli taraptardy aldaǵy ózgeristerge ýaqtyly habardar etýdi jáne daıyndaýdy qamtamasyz etedi.
Aıta keteıik, ETS – bilim berý jáne talanttardy damytý salasyndaǵy halyqaralyq uıym. Ol ýaqyt synynan ótken TOEFL, TOEIC, GRE, Praxis jáne Futurenav sııaqty emtıhandar men daǵdyny baǵalaý sheshimderi, sondaı-aq ETS ınstıtýty júrgizetin ınnovasııalyq zertteýler arqyly jumys isteıdi. 200-den astam el men aýmaqtaǵy enshiles kompanııalar men keńselerden turatyn jahandyq jeli arqyly ETS jyl saıyn 50 mıllıonnan astam adamnyń óz qabiletterin baǵalap, jańa múmkindikter ashýyna kómektesedi.
