Bizde áıelderdi kemsitýshilik bolmaıdy

Keshe Astananyń «Beıjiń saraıy» qonaq úıinde Prezıdenttiń janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa tóraıymynyń orynbasary, Májilis depýtaty Elena Tarasenkonyń tóraıymdyǵymen BUU Áıelderge qatysty kemsitýlerdi joıý jónindegi komıtetiniń qorytyndy usynystaryn júzege asyrý úshin memlekettik organdar men ÚEU ara­syn­daǵy ózara is-qımyldyń tıimdiligin arttyrý máselelerin talqylaǵan dóńgelek ústel ótkizildi. Ony ashqan Elena Tarasenko aldymen Memlekettik hatshy, Ulttyq komıssııanyń tóraıymy Gúlshara Ábdiqalyqovanyń quttyqtaýyn oqyp berdi. Onda Memlekettik hatshy dóńgelek ústelge qatysýshylarǵa tıimdi jumys isteýdi tilegen eken. Osydan ári moderator dóńgelek ústeldiń maqsatyna keńirek toqtalyp ótti. Biz búgin 2015 jyldyń naýryz aıynda Nıý-Iork qalasynda bolatyn áıelderdiń mártebesi jónindegi komıssııanyń 59-shy sessııasyna ázirlik máselelerin talqylaımyz. Sondaı-aq, BUU-nyń áıelderge qatysty kemsitýlerdi joıý jónindegi komıtetine usyný úshin Qazaqstandaǵy merzimdi esepterdiń nátıjeleri boıynsha qorytyndy usynystardy oryndaý boıynsha sharalar qoldanýdyń nátıjeleri týraly elimizdiń baıandamasyn ázirleımiz, dedi E.Tarasenko. Búgingi kúni Qazaqstanda júrgizilip otyrǵan otbasylyq demografııalyq saıasattyń ana bolýǵa yntalandyrý, senimdi áleýmettik kepildikter sııaqty negizgi baǵyttary Elbasynyń jyl saıynǵy Joldaýlarynda kórinis taýyp, nátıjesinde áıelderdi, otbasylaryn, ana men balany memlekettik qoldaýdyń tutastaı júıesi quryldy. Qazirgi zamandaǵy jahandyq syn-qaterlerdiń qaýipti jaǵdaıynda jańa ekonomıkalyq saıasatty júzege asyrýǵa áıelderdiń belsendi túrde qatysý máseleleri de qyz-kelinshekterge qatysty kemsitýshilikterdi joıýǵa múmkindik beretin jáne Qazaqstan qoǵamynda genderlik teńdikti qoldaıtyn saıası tetikterdiń biri bolyp tabylady, dedi óziniń sózinde moderator. Budan buryn, 2014 jylǵy aqpanda Jenevada bolǵan májiliste Qazaqstan BUU-nyń Áıelderdi kemsitýge qarsy kúresi jónindegi konvensııasy talaptaryn qalaı oryndap jatqany jóninde baıandaǵan bolatyn. Osy baıandamaǵa halyqaralyq sarapshylar qanaǵattanǵandyq bildiripti. Endi kezekti baıandamaǵa daıyndyq jumystary júrgiziletin boldy. Elimizdiń Konstıtýsııasyna sáıkes, Konvensııa halyqaralyq quqyqtyq qujat bolǵandyqtan, ishki zańdarǵa qaraǵanda ústemdikke ıe. Alaıda, osy tarapta sheshilýge tıisti birshama problemalar bary aıtyldy. Máselen, memlekettik organdardyń, qalyń jurtshylyqtyń Konvensııa talaptary týraly bilikteri az bolýy sebepti ishinara genderlik kemsitýshilikke jol beriledi. Dóńgelek ústel barysynda osy máseleler basty nazarda bolyp, jınalǵandar oǵan qatysty oı-pikirlerin ortaǵa saldy. Atalǵan Konvensııa talaptaryn oryndaý jónindegi Ulttyq is-sharalar josparyna aıtylǵan usynystardyń mańyzdylary engiziletin boldy. Jıynǵa Parlament depýtattary, Prezıdent janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa músheleri, ÚEU men BAQ ókilderi qatysty. Jaqsybaı SAMRAT, «Egemen Qazaqstan».