Kúrestiń osy túrinen shırek ǵasyrda elimizge alǵashqy altyndy ákelgen álem chempıonyn jeńisimen quttyqtaýǵa arnalǵan jıynǵa oblystyń zııaly qaýym ókilderi, quqyq qorǵaý organdarynyń basshylary, sport salasynyń ardagerleri qatysty. Aımaq basshysy Aıdostyń jeńisi barsha elimizdiń mártebesin arttyrǵanyn atap ótti.
– Aıdos Sultanǵalıuly Horvatııa astanasy Zagreb qalasynda ótken eresekter arasyndaǵy álem chempıonatynda qazaq sporty tarıhyndaǵy teńdessiz jetistikke qol jetkizdi. Grek-rım kúresinen álem chempıonatynyń altynyn elimizge sońǵy ret 1999 jyly Grekııanyń Afına qalasynda ótken dúbirli dodada 63 keli salmaqta beldesken Mhıtar Manýkıan alyp kelgen eken. Shırek ǵasyrdan keıin osy jetistikti qaıtalap, jeńistiń eń bıik tuǵyryna kóterilgen chempıonymyzdy Memleket basshysy arnaıy quttyqtap, «Aıdos – grek-rım kúresinen osy ǵasyrdaǵy tuńǵysh jeńimpaz», dep joǵary baǵalady. Bul jeńis – jas balýandarymyzǵa úlgi-ónege, elimizdiń sportyna serpin beretin tamasha tabys. Aıdos baýyrymyzdyń jeńisine bapkeri Ǵabıden Raıymbekulynyń sińirgen eńbegi zor. Ol tek sportshyny emes, maqsatynan aınymaıtyn myqty azamatty tárbıelep shyǵardy. Shákirtiniń árbir jeńisi – bapkeriniń mańdaı teriniń jemisi. Qos batyrymyzǵa qandaı qurmet kórsetsek te laıyqty. Aıdosqa buǵan deıin de memleket, oblys tarapynan qoldaý kórsetilip keledi. О́tken jyly elimizdiń, óńirimizdiń janashyr azamaty Baqdáýlet Erkinbekulynyń demeýshiligimen avtokólik tabys etildi. Budan bólek, aı saıyn 1 mln teńge memlekettik stıpendııa beriledi. Bul qoldaý ári qaraı jalǵasady. Búgingi mereıli sátte barsha Syr jurtshylyǵynyń atynan Aıdosqa jańa avtokólik pen páter kiltterin tabystap, bapkeri Ǵabıdenge de jańa páter berý týraly sheshim qabyldadyq, – dedi oblys basshysy.
Basqosýda grek-rım kúresinen elimizdiń eńbek sińirgen jattyqtyrýshysy Ǵabıden Raıymbek pen álem chempıony Aıdos Sultanǵalıuly ózderine kórsetilgen qurmetke rızashylyq bildirdi.
QYZYLORDA
