Kollaj: kursiv.media
«Qazaqstan men Reseı úshin bıylǵy jyl aıtýly mereıtoılyq sharalarmen este qaldy. Solardyń ishindegi eń mańyzdysy – Uly Jeńistiń 80 jyldyǵy. Bul – halyqtarymyzdyń tarıhyndaǵy eń uly oqıǵalardyń biri.
Belgili bolǵandaı, ár besinshi qazaqstandyq maıdanǵa attandy, olardyń shamamen jartysy shaıqas alańynda qaza tapty. Mıllıondaǵan azamattarymyz – kári de, jas ta tylda aıanbaı eńbek etti. Maıdanda qaza tapqan jaýyngerlerdiń esimin máńgi este qaldyrý maqsatynda jankeshti eńbek etip júrgen Qazaqstan, Reseı jáne basqa da elderdiń erikti izdeýshilerine shyn júrekten alǵysymdy bildiremin», dedi Prezıdent.
Sonymen qatar jeńis mereıtoıyna oraı Astanada aýqymy jaǵynan buryn-sońdy bolmaǵan áskerı sherý ótkenin, elimizdiń túkpir-túkpirinde ákelerimiz ben atalarymyzdyń erligine arnalǵan júzdegen estelik is-shara uıymdastyrylǵanyn tilge tıek etti.
«Bizdiń elderimizdi biriktiretin taǵy bir mańyzdy beles – ańyzǵa aınalǵan Baıqońyr ǵarysh aılaǵynyń 70 jyldyq mereıtoıy. Bul keshen álemdik kosmonavtıkanyń besigi ári adamzat aqyl-oıynyń ulylyǵyn aıǵaqtaıtyn nyshan bolyp sanalady. Ondaǵan jyldar boıy Baıqońyr eki memlekettiń strategııalyq áriptestiginiń berik dánekeri retinde ǵylymı-tehnıkalyq progresti jáne bolashaqqa umtylysty beınelep keledi», dep jazady Memleket basshysy.
