«Men endi «Berkshire Hathaway»-diń jyldyq esebin jazbaımyn jáne aksıonerlerdiń jyldyq jınalysynda únemi sóz sóıleı bermeımin… Brıtandyqtar aıtqandaı, men «tynym tabamyn», dep jazylǵan kompanııa jarııalaǵan hatta.
Baffett 1800 A klasty Berkshire Hathaway aksııalaryn 2,7 mıllıon B klasty aksııaǵa aýystyrǵanyn jáne olardy dúısenbi kúni tórt otbasy qoryna (Susan Thompson Buffett Foundation, Sherwood Foundation, Howard G. Buffett Foundation jáne NoVo Foundation) tabys etkenin habarlady. Jalpy qaıyrymdylyq kólemi 1,3 mıllıard dollardan asty.
Mıllıarder qaıyrymdylyq aýdarymdaryn jyldamdatý onyń Berkshire Hathaway bolashaǵy jónindegi kózqarasyn qaıta qaraýymen baılanysty emes ekenin atap ótti. Bul sheshim onyń muragerleriniń jasymen jáne qarajatty olar úlgerip, basqara alýy úshin qabyldanǵan. Basqarý bıligi 63 jastaǵy Greg Abelge ótkenshe, 95-ke kelgen Baffett óz mindetin atqara turady.
Baffett sondaı-aq kompanııanyń turaqtylyǵyn atap ótti.
«Shamamen 60 jyl ishinde Berkshire Hathaway paıdasyz toqyma fabrıkasynan saqtandyrý, kólik, energetıka jáne tutyný aktıvterin qamtıtyn trıllıon dollarlyq konglomeratqa aınaldy», deıdi ol.
Qyrkúıek aıynyń sońynda kompanııanyń qolda bar aqshasy rekordtyq 381,6 mıllıard dollardy qurady. Úshinshi toqsandaǵy paıda 34%-ǵa ósti, al aksııalar jyl basynan beri shamamen 10%-ǵa kóterildi.
«Men jalpy alǵanda ózimdi jaqsy sezinemin. Degenmen baıaý qozǵalamyn jáne oqý qıyndaý, biraq aptasyna bes kún ofıske baryp, tamasha adamdarmen jumys isteımin», dep jazdy Baffett.
