Baǵdarlama aıasynda qatysýshylarǵa eki negizgi múmkindik qarastyrylǵan. Birinshisi – 100 aılyq eseptik kórsetkish (AEK) kóleminde bir rettik kóterme járdemaqy. Bul aýylǵa baryp, jańa ortaǵa beıimdelip jatqan jas mamandar úshin eleýli kómek bolmaq.
Ekinshi jáne eń mańyzdysy – turǵyn úıge 1 paıyzdyq jeńildetilgen nesıe. Buryn mundaı shart qarastyrylmaǵan edi. Endi aýyldyq jerde úı salý nemese satyp alý áldeqaıda qoljetimdi bolmaq. Nesıe somasy eldi mekenge baılanysty 2 500 AEK-ke deıin, al qaıtarý merzimi 15 jylǵa deıin belgilenedi. Bul ýaqyt aralyǵynda maman turaqty jumys istep, óz ómirin qalyptastyra alady.
Baǵdarlamaǵa bilim berý, densaýlyq saqtaý, áleýmettik qorǵaý, mádenıet, sport, agroónerkásip salalarynda jumys isteıtin mamandar qatysa alady. Sondaı-aq aýyldyq okrýg ákimdikteriniń apparat qyzmetkerleri de ótinim bere alady, biraq ákimder men olardyń orynbasarlary bul tizimge enbeıdi.
Qatysýshylarǵa qoıylatyn talaptar da naqty kórsetilgen: úmitkerdiń tehnıkalyq, kásiptik nemese joǵary bilimi bolýy shart jáne ol alǵan mamandyǵy boıynsha keminde úsh jyl aýylda jumys isteýge mindetti. Buǵan qosa, burynǵy nesıeleri boıynsha merzimi ótken qaryz bolmaýy kerek.
О́tinim berý prosesi barynsha jeńildetilgen. Aldymen jas maman aýyldaǵy bos jumys ornyn tabýy nemese jergilikti ákimdikke júginýi qajet. Keıin Baspana Market onlaın platformasynda tirkelip, elektrondy ótinim tapsyrady. Barlyq qujattarǵa ESQ arqyly qol qoıýǵa múmkindik bar.
Joba qoǵamda oń pikir týdyrdy. Kópshilik «jas mamandarǵa osyndaı múmkindik berilýi – memleket tarapynan naqty qamqorlyqtyń belgisi» dep baǵalap otyr. Al aýyl turǵyndary jastardyń kelýi aýyl ómirine jańa serpin beretinin aıtady. О́z kezeginde jas mamandar «1 paıyzdyq nesıe – buryn bolmaǵan erekshe múmkindik» dep qýanyshtaryn jasyrmaı otyr.
