Foto: UOK
1921 jyly qurylǵan Halyqaralyq at sporty federasııasy ǵasyrdan astam ýaqyt boıy álemdik jarystardyń erejesi men júıesin qalyptastyryp keledi. Bıylǵy talqylaýlarda qazaqstandyq delegasııa konkýr men vıezdka salalaryndaǵy erejelerdi jetildirý, Olımpıada oıyndary men 2026 jyly Aahende ótetin álem chempıonatyna irikteý formatyn ózgertý máselelerin kóterdi. Sondaı-aq sportshylardyń qaýipsizdigi men jylqylardyń ál-aýqaty, sıfrlyq veterınarlyq pasport júıesin engizý jáne ashyq ári kásibı basqarý úlgisin damytý taqyryptary qaraldy.
6–7 qarasha kúnderi ótken plenarlyq otyrystar men daýys berý qorytyndysy boıynsha Qazaqstanǵa 2026 jyly FEI aıasyndaǵy úsh halyqaralyq jarysty ótkizý quqyǵy berildi. Olardyń qatarynda Álem kýbogynyń kezeńi, FEI World Cup Challenge fınaly jáne Eýrazııalyq lıga fınaly bar. Bul sheshim elimizdegi at sportyn jańa deńgeıge shyǵaryp, qazaqstandyq sportshylarǵa halyqaralyq reıtıngtik upaılardy óz elinde jınaýǵa múmkindik beredi. Sonymen qatar sheteldik jarystarǵa qatysý shyǵynyn azaıtyp, júıeli daıyndyqqa jol ashady.
Qazaqstan at sporty federasııasy prezıdentiniń keńesshisi Sergeı Býıkevıch bul sheshimniń mańyzyn atap ótti:
«Kýbok kezeńi men FEI World Cup Challenge fınalyn ótkizý quqyǵyn alý – elimizdegi at sportynyń júıeli damýy úshin mańyzdy qadam. Qazaqstandyq sportshylar alǵash ret halyqaralyq upaıdy óz jerinde jınaı alady. Jas shabandozdar úshin de bul – álemdik fınaldarǵa qatysýdyń biregeı múmkindigi. Endi bizdiń mindetimiz – uıymdastyrý deńgeıin joǵary ustap, osy múmkindikti sportshylardy daıyndaý jolynda tıimdi paıdalaný», dedi ol.
FEI prezıdenti Ingmar de Vos, uıymdy 12 jyl basqarǵannan keıin Halyqaralyq Olımpıada komıtetine aýysatynyn málimdep, Qazaqstannyń bastamasyn joǵary baǵalady. Ol bizdiń elde týrnırler ótkizý federasııanyń geografııasyn keńeıtý jáne jańa elderdi jahandyq sport kúntizbesine qosý saıasatyna saı keletinin aıtty.
Qazaqstan delegasııasy sonymen qatar jattyqtyrýshylardy daıarlaý júıesin jetildirý jáne sportshylardy halyqaralyq sertıfıkattaý jobalaryn usyndy. Bul bastamalar FEI jáne Olympic Solidarity tarapynan qoldaý taýyp, Coaching System baǵdarlamasyn engizý jóninde kelisim jasaldy.
Assambleıanyń qorytyndy sátinde Longines FEI Awards marapattaý rásimi ótti. Onda jyl úzdikteri atanǵan sportshylar, jattyqtyrýshylar jáne jarys uıymdastyrýshylary marapattaldy.
