Foto: Vıdeoskrın
«Soıýz-5» zymyrany Samaradaǵy «Progress» zaýytynda qurastyrylyp, boıalyp, synaqtan ótkizilgennen keıin temirjol arqyly 1800 shaqyrymdy júrip ótip, Baıqońyrǵa jetkizildi. «Roskosmos» baspasóz qyzmetiniń habarlaýynsha, tasymaldaý kezinde qurylǵynyń mehanıkalyq qaýipsizdigin qamtamasyz etý úshin arnaıy vagondarmen tasymaldanǵan.
Baıqońyrǵa kelgen soń, zymyran bloktary «Báıterek» birlesken kásipornynyń montajdyq-synaq korpýsyna ornalastyryldy. Munda olar aldaǵy ushyrylymǵa daıyndyq jumystarynan ótedi.
Alǵashqy synaqtyq ushyrý 2025 jyldyń 25 jeltoqsanyna josparlanǵan.
Eske salaıyq, «Báıterek» ǵarysh-zymyran kesheni burynǵy «Zenıt-M» kesheniniń ınfraqurylymy negizinde salynyp jatyr. Reseı jaǵy jańa «Soıýz-5» zymyranyn jasaýǵa, al Qazaqstan jaǵy ushyrý keshenin daıyndaýǵa jaýapty.
«Soıýz-5» zymyranynyń ushý synaqtarynyń bastalýy geosaıası jaǵdaı men logıstıkalyq tizbekterdiń úzilýine baılanysty 2023 jyldan 2025 jylǵa aýystyrylǵan edi.
