Foto: pinterest.com
Básekelestikti qorǵaý jáne damytý agenttiginiń Ulytaý oblysy boıynsha departamenti 2024 jyly «Jezqazǵan-Eır» AQ-ǵa qatysty antımonopolııalyq tergeý júrgizgen edi. Tergeý barysynda kompanııanyń áreketterinen básekelestik týraly zańnamany buzý belgileri anyqtalǵan.
Kompanııa bul qorytyndymen kelispeı, Ulytaý oblysynyń aýdanaralyq mamandandyrylǵan ákimshilik sotyna júgingen. 2024 jylǵy 25 qarashada birinshi satydaǵy sot ákimshilik talapty qanaǵattandyryp, tergeý materıaldarynyń kúshin joıǵan bolatyn.
Alaıda Departament apellıasııaǵa shaǵym túsirip, 2025 jylǵy 20 naýryzda Ulytaý oblystyq sotynyń ákimshilik ister jónindegi alqasy birinshi satydaǵy sheshimdi joıyp, jańa sheshim shyǵardy. Sonyń nátıjesinde «Jezqazǵan-Eır» AQ-nyń talaby tolyǵymen qanaǵattandyrýsyz qaldyryldy.
Kompanııa bul sheshimge qarsy kassasııalyq shaǵym joldaǵanymen, 2025 jylǵy 23 qazanda kassasııalyq ınstansııa ony qanaǵattandyrmady. Osylaısha, 2025 jylǵy 20 naýryzda qabyldanǵan oblystyq sot sheshimi zańdy kúshinde qaldy.
Departament tergeýine sáıkes, «Jezqazǵan-Eır» AQ 2022 jyldyń qarashasy men 2023 jyldyń mamyry aralyǵynda avıaotyn satý kezinde monopolııalyq kiris alǵan. Jalpy tabys – 276 768 379 teńge, onyń ishinde monopolııalyq tabys 22 919 186 teńgeni quraǵan. Al aınalymnyń 3%-y – 8 303 051 teńge.
Alynǵan tabys 20 000 aılyq eseptik kórsetkishten asyp ketkendikten jáne laýazymdy tulǵalardyń áreketterinde qylmystyq sıpattaǵy belgiler bolýy yqtımal bolǵandyqtan, materıaldar buǵan deıin Qarjy monıtorıngi agenttiginiń Ulytaý oblysy boıynsha ekonomıkalyq tergeý departamentine joldanǵan-dy. Biraq sot prosesteri júrip jatqan kezeńde materıaldardy qaraý ýaqytsha toqtatylǵan.
Endi kassasııalyq sot qaýlysy zańdy kúshine engendikten, barlyq sheshimder ekonomıkalyq tergeý departamentine qaıta joldanyp, tıisti sharalar qabyldanatyn bolady.
