Operasııany Medısınalyq ortalyqtyń kardıohırýrgteri Qytaıdan kelgen mamandarmen birlese otyryp, Halyqaralyq ǵylymı-tájirıbelik konferensııa aıasynda júzege asyrdy.
– Týa bitken júrek aqaýy – júrekshelik perde aqaýy bar 28 jastaǵy naýqasqa sońǵy úlgidegi robottyq hırýrgııalyq júıe arqyly ota jasaldy. Operasııa dástúrli ádis – sternotomııasyz, ıaǵnı keýde súıegin ashpaı, shaǵyn tilik arqyly ótti. Qazirgi ýaqytta naýqastyń jaǵdaıy jaqsy, – delingen habarlamada.
Medısınalyq ortalyqtyń málimetinshe, bul ota – joǵary tehnologııaly kardıohırýrgııany damytý men halyqaralyq medısınalyq yntymaqtastyqty nyǵaıtý jolyndaǵy mańyzdy qadam.
Konferensııa aıasynda sheteldik sarapshylar da konsýltasııalar ótkizdi. Máskeýden kelgen medısına ǵylymdarynyń doktory, kardıolog ári fýnksıonaldy dıagnostıka mamany Olga Djıoeva ortalyqtyń kardıologtarymen birge naýqastardy qabyldady. Al Japonııadaǵy Áýlıe Marııa aýrýhanasynyń gematologııa bóliminiń meńgerýshisi, professor Jeon Yungwoo toǵyz pasıentke keńes berdi.
Aıta ketsek, Astanada ótken iri halyqaralyq ǵylymı-tájirıbelik konferensııa óz jumysyn aıaqtady. Baǵdarlama kardıohırýrgııa, onkologııa, ıadrolyq medısına, neırohırýrgııa, terapııa, sıfrlandyrý, farmasevtıkalyq retteý, meıirbıkelik is, kóshbasshylyq jáne medısınalyq kómektiń sapasyn basqarý sııaqty ózekti taqyryptardy qamtydy.
Forýmǵa jetekshi klınıkalar men ǵylymı ınstıtýttardyń, sondaı-aq Qazaqstandaǵy joǵary oqý oryndarynyń ókilderi jáne onnan astam elden kelgen sheteldik sarapshylar qatysty.
Konferensııa tájirıbe almasýǵa, ınnovasııalyq medısınalyq jáne bilim berý tehnologııalaryn damytýǵa arnalǵan mańyzdy alańǵa aınaldy.
Barlyǵy tórt myńǵa jýyq adam konferensııanyń onlaın jáne oflaın formattarynda ótken is-sharalarǵa qatysty. Sessııalardyń tikeleı translıasııalaryn qaraý sany tórt myńnan asty.
