Is materıaldaryna sáıkes, 2025 jylǵy 5 shilde kúni shamamen saǵat 16:00-de D. esimdi júrgizýshi Kia Sedona markaly kóligimen Almaty – Ekaterınbýrg tasjolymen Balqash baǵytyna qaraı júrgen. 791-shaqyrym tusynda ol jol belgilerin elemeı, aq tústi Toyota kóligin basyp ozbaq bolyp, qarsy baǵyttaǵy jolaqqa shyqqan.
Osy sátte ol júk kólikteriniń salmaǵyn ólsheıtin jabdyq ornatýǵa arnalǵan shuńqyrǵa túsken. Saldarynan Kia Sedona joldyń eki jaǵyndaǵy metall qorshaýlarǵa soǵylyp, órtenip ketti.
Oqıǵa ornynda kóliktegi jeti jolaýshy kóz jumdy. Al júrgizýshi men taǵy bir adam jaraqat alyp, Shet aýdandyq aýrýhanasyna jetkizildi. Medısınalyq saraptama jolaýshynyń ortasha aýyr jaraqattar alǵanyn anyqtaǵan.
Aıyptalýshynyń kinási óz moıyndaýy, jábirlenýshiler men kýálardyń aıǵaqtary, jol apatynyń syzbasy, saraptama qorytyndylary jáne basqa da dáleldermen rastaldy.
Memlekettik aıyptaýshy sottan D.-ǵa bes jyl bas bostandyǵynan aıyrý jazasyn taǵaıyndaýdy surady. Jábirlenýshilerdiń biri qatańyraq jaza qoldanýdy talap etse, qalǵandary prokýrordyń talabyn qoldady.
Qorǵaýshy tarap sottan aıyptalýshynyń ókinýin eskerip, eń tómengi merzimde jaza taǵaıyndaýdy surady.
Zań boıynsha bul qylmys úshin 5 jyldan 10 jylǵa deıin bas bostandyǵynan aıyrý jazasy kózdelgen. Sot aıyptalýshynyń kámeletke tolmaǵan balasy bar ekenin, sondaı-aq onyń kinásin moıyndap, ókingenin eskerdi,sol sııaqty aýyrlatatyn mán-jaılar anyqtalǵan joq.
Nátıjesinde sot D.-ǵa bes jyl bas bostandyǵynan aıyrý jáne jeti jyl merzimge kólik júrgizý quqyǵynan aıyrý jazasyn taǵaıyndady. Ol jazasyn qaýipsizdigi tómen kolonııada óteıdi.
Úkim áli zańdy kúshine engen joq.
