Aýyl balalaryn qýanyshqa bóledi

Qaıyrbek Qojaǵalıuly – osy aýylda týyp-ósken parasatty azamat. Ol kezinde Qorǵan qalasyndaǵy aýyl sharýashylyǵy ınstıtýtynyń aýyl sharýashylyǵyn mehanıkalandyrý fakýltetin bitirgen. Eńbek jolyn 1974 jyly «Obrazsovyı» keńsharynda qarapaıym mehanızator bolyp bastaǵan. Odan arǵy ómiri áskerlik mindet, ınstıtýtpen jal­ǵasady. Joǵary bilim alǵan soń «Baı Eńbekke» bólimshe basqa­rý­shylyǵyna taǵaıyndalady. Jer­lesterine jany ashyp, qol ushyn berip júretin bolǵan soń aýyldastarynyń arasynda úlken bedelge ıe. Sondyq­tan da 90-jyldardyń basynda keń­shar taraǵanda jerlesteri ózderine tıesili jer paıyn Qaırekeńe berip, ol «Eńbek» sharýa qojalyǵyn ashady. Sodan beri bireýden keıin, bireýden ilgeri bolyp óziniń sharýashylyǵyn damyta beredi. 1997 jyly aýyldyń ejelgi aty «Baı Eńbekti» alyp, seriktestik qurady.

Qaıyrbek Qojasovty úlken jer ıelengen, iri sharýalardyń qataryna qosa almaısyń. Onyń astyq egetin barlyq jer kólemi 3 600 gektar ǵana. Alaıda elge, jerge jany ashyp, sha­rýa­shylyǵyn dóńgeletken saıyn taby­sy jyldan-jylǵa artyp keledi. Onyń ústine bilimi men tájirıbesi ozyq azamattyń isi alǵa basyp tur. Ag­ro­tehnologııalyq talaptar tolyq egis alqaptary sońǵy jyldary gek­ta­ry­nan 30 sentnerge jýyq ónim beredi.

Keıbireýler sııaqty tabysyn qalaǵa tasýǵa, jaqsy kólik, jaıly úı alýǵa shyǵyndamaı, týǵan jerin kógertýge jumsap otyrǵan Qaırekeń buǵan deıin óz qarajatymen aýyldastaryn taza aýyzsýmen de qamtamasyz etken edi. Jańa turǵyzylǵan aýyl úılerine sý kirgizip, santehnıkalyq quraldardy da ornatyp bergen. Jyl saıyn arnaıy brıgadaǵa aqy tólep, aýyldastarynyń úıine jóndeý jumysyn da júrgizip beredi. Jumyskerlerine paı úlesin berýmen qatar, jem-shópti de tómendetilgen baǵaǵa jetkizedi. Aýyldy abattandyrý aıasynda jyl saıyn kóshet egý, aýyl ishindegi qorshaýlardy, joldardy jańartý boıynsha da ju­mys júrgizedi. 2024 jyly 1 myń­ǵa jýyq kóshet ekken kórinedi. Aýyl­dastardyń aıtýyna qaraǵanda, sha­rýashylyq ardagerler, kópbalaly jáne az qamtylǵan otbasylarǵa, ómirlik qıyn jaǵdaıǵa tap bolǵan jandarǵa da kómek qolyn sozady.

Qaıyrbek Qojasovtyń aýyly ejelden «Baı Eńbek» atalǵan. О́ıt­keni bul aýyldyń ornalasqan jeri tamasha. Dál Esil ózeniniń jaǵasy, shóbi shúıgin, topyraǵy qunarly. Biraq janashyr ıe bolmasa, qansha qunarly jerde tursa da aýyl shashylyp qalar edi. Soltústiktiń ta­laı aýyly solaı tozyp ketken. Qaıyr­bekteı balasy bolǵan «Baı Eńbek­tiń» baǵy bar. Qazir Qaırekeń aýyl­dyń adam sanyn kóbeıtý maqsa­tymen qonys aýdarýshylarǵa arnap birneshe úı saldy. Ázirge 50 oqýshy­ǵa shaqtalǵan jańa bastaýysh mek­tepti de bala sany kóbeıse keńitýdi oılap qoıǵan. Ázirge 20 shaqty adam­ǵa jumys ornyn ashqan mektep zamanǵa saı jabdyqtalǵan. Oqý oshaǵy tórt synyp pen mektepke deıingi daıarlyq tobyn qamtıdy. Ár synyp erekshe túspen bezendirilgen. Ǵımaratta sport zaly, zamanaýı jı­hazdary bar, oqý quraldary tolyq­taı jetkizilgen. Bul ǵımarat tek bilim salasyna ǵana emes, aýyldyń áleýmettik-ekonomıkalyq damýyna qosylǵan zor úles ekeni daýsyz.

Buǵan deıin aýyl balalary Iаv­len­ka, Pokrovka aýyldaryna qaty­nap oqýǵa májbúr bolatyn. Olar úshin arnaıy tasymaldaý uıym­dastyrylǵanymen, bul ýaqyt pen shyǵyndy talap etetin edi. Endi bala­lar týǵan topyraǵynda, ata-anasy­nyń qasynda ana tili men ulttyq qundylyq aıasynda bilim alady.

Qaıyrbek Qojasov «Eńbek arda­geri» medalimen, Aýyl sharýashylyǵy mınıstriniń Qurmet gramotasymen, Soltústik Qazaqstan oblysy ákiminiń, Esil aýdany ákiminiń Qurmet gramotalarymen marapattalǵan, «Paryz-2019» syılyǵynyń jeńim­pazy. Soltústik Qazaqstan oblysy Esil aýdandyq máslıhatynyń I, III sha­qyrylymynyń depýtaty bolǵan. Res­pýblıka kúnine oraı ol «Eren eńbegi úshin» medalimen marapattaldy.

Jańa mekteptiń ashylý saltanatyna oblys ákimi Ǵaýez Nurmu­hambetov te qatysyp, mesenattyń bastamasyna rızashylyǵyn bildir­di. «Bul – bıznestiń áleýmettik jaýap­kershiligi men týǵan aýyldyń damýyna qosqan zor úlesiniń aıqyn mysaly», – dedi ol óziniń sózinde.

Soltústik Qazaqstan oblysy