Foto: pinterest.com
Agenttiktiń málimdeýinshe, sanksııa tizimine Harkovtegi GK Imperativ Ukraina LLC jáne Kıev pen Harkov qalalarynda jumys isteıtin Ekofera LLC engizilgen. Tergeý materıaldaryna qaraǵanda, Iran osy kompanııalar arqyly Ýkraınadan avıasııa men zymyran óndirisine qajetti aerokosmostyq ónimderge tapsyrys berip otyrǵan. Olardyń qatarynda avıagorızont, magnıtometr, qozǵaltqysh jáne generator bólshekteri bar. Keıin bul jabdyqtar Irannyń HESA avıasııalyq-ónerkásiptik kásipornyna jetkizilgeni aıtylady.
Qarjy mınıstrligi shekteýlerdiń jappaı qyryp-joıý qarýyn taratýǵa qatysy bar tulǵalarǵa baǵyttalǵan 13382 atqarýshylyq jarlyq aıasynda engizilgenin habarlady. Osy jarlyqqa sáıkes HESA kompanııasyna qarjylaı, tehnologııalyq nemese ózge de qoldaý kórsetý áreketiniń bári sanksııaǵa negiz bola alady.
Vedomstvonyń dereginshe, ýkraınalyq kásiporyndar Irannyń Ababil zymyrandary men Shahed serııasyndaǵy drondary úshin qajetti bólshekterdi satyp alýmen aınalysqan keń kólemdi transulttyq jeliniń bir bóligi bolǵan. Bul júıege BAÁ, Túrkııa, Qytaı, Gonkong, Úndistan jáne Germanııada ornalasqan birneshe kompanııa kirgen. Atalǵan memleketterdiń kásiporyndaryna da AQSh tarapynan shekteýler qoıyldy.
