Janjaldasqan Jamalıev 13 jylǵa bas bostandyǵynan aıyryldy

Keshe Astananyń maman­dan­dyrylǵan aýdanaralyq qylmystyq ister jónindegi soty belgili bıznesmen Qaırat Jamalıevke qatysty qylmystyq isti aıaqtap, ony 13 jylǵa bas bostandyǵynan aıyrdy. Sottalýshy bul merzimdi qatań rejimdegi kolonııada óteıtin boldy. Sonymen qatar, onyń barlyq múlikteri tárkilenedi. Osylaısha, Astana qalasynyń turǵyny Álibıdi uryp-soqqan Jamalıevtiń atyshýly qylmystyq isin qaraýdy qolǵa alǵan sot tóraǵasy Erbol Rahymbekov sot prosesine sońǵy núkteni qoıdy. Al prosess bıylǵy 11 maýsymda bastalǵan edi. Sottyń jabyq túrde ótken is qaraýy eki aıǵa jýyq ýaqytqa sozyldy. Sottyń sheshimi boıynsha, osy iske qatystary bar Arman Ábil­taev 12 jyldyq jazaǵa kesilse, Ana­tolıı Prıbytkov 8 jylǵa bas bos­tandyǵynan aıyryldy. Bulardyń ekeýi de jazalaryn qatań rejimdegi kolonııada óteıdi. Ekeýiniń de múlikteri tárkilenedi. Aıta ketetin jaıt, sottyń shy­ǵar­ǵan úkimine sáıkes, munda másele sottalýshylardyń barlyq múlkin tárkileý týraly boldy. Al sottalýshylardyń bul úkimge sha­ǵymdana alatyny aıtylyp otyr. Sottalýshylarǵa úkim shyǵarý ashyq túrde ótti. Taǵy bir aıta keterligi, osyǵan deıin memlekettik prokýrordyń istegi basty kúdikti kásipker Qaırat Jamalıevti 10 jylǵa bas bostandyǵynan aıyrýdy suraǵany habarlanǵan edi. Sonymen qatar, ol Ábiltaevti múlkin tárkileı otyryp, 8 jylǵa bas bostandyǵynan aıyrýdy, al Prıbytkovty 7 jylǵa bas bostandyǵynan aıyrýdy talap etken. Maýsymnyń 11-inde bastalǵan sot prosesine Qaırat Jamalıev pen Anatolıı Prıbytkov qana keldi. Bul kezde Arman Ábiltaev izdeýde bolatyn. Prosess bastalǵannan keıin bir aptadan soń qashqyn qolǵa tústi. Ol óziniń óń-túsin biraz ózgeriske túsirip alǵan eken. Qurysh NURYMBET.