Foto: Ashyq derekkóz
«Biz buǵan deıin egin sharýashylyǵyn damytý baǵytynda biraz jumys júrgizdik, jaqsy nátıjege qol jetkizdik. Endi mal sharýashylyǵyna basa mán berýimiz kerek. Baıtaq dalamyzdyń barlyq aımaǵynda jyl on eki aı boıy mal baǵýǵa bolady. Osy múmkindikti durys paıdalaný qajet. Árıne, maldy baǵyp, ósirý, onyń sanyn kóbeıtý – ońaı sharýa emes, óte kúrdeli jumys. Memleket tıisti qoldaý kórsetedi. Qazir naqty qarjylandyrý tetikteri bar: jaıylymdardy sýmen qamtamasyz etýge, mal bordaqylaıtyn oryn salýǵa jáne asyl tuqymdy mal alýǵa memleketten sýbsıdııa berilip jatyr. Byltyrdyń ózinde osy maqsatqa 60 mıllıard teńgeden astam qarjy bólindi. Sondaı-aq sharýashylyǵyn keńeıtem degen kásip ıelerine jeńildikpen nesıe alýǵa múmkindik bar», dedi Prezıdent.
Sonymen qatar Qasym-Jomart Toqaev sharýashylyǵyn keńeıtem degen kásip ıelerine jeńildikpen nesıe alýǵa múmkindik bar ekenin atap ótti.
«Joldaýda mal sharýashylyǵy salasyndaǵy agrobıznesti qoldaý josparyn ázirleýdi tapsyrdym. Maqsat – mal basyn eseleý. Sol arqyly Qazaqstannyń halyqaralyq naryqqa et jetkizýshi iri el retindegi mártebesin bekite alamyz. Bul muratqa jetý úshin mal sharýashylyǵyn damytýǵa ońtaıly jaǵdaı jasaý qajet. Et baǵytyndaǵy mal sharýashylyǵynyń júıeli óndiristik sıklin engizý jumystaryn jalǵastyrǵan jón. Jaıylymdyq jerlerdi tıimdi ári aýystyryp paıdalaný tásiline basa mán bergen durys», dedi Memleket basshysy.
Memleket basshysynyń pikirinshe, veterınarııa salasyndaǵy jaǵdaı máz emes ekenin moıyndaý qajet. Eń aldymen, bul salany materıaldyq-tehnıkalyq turǵydan qamtamasyz etý kerek.
«Mal dárigerleriniń eńbek jaǵdaıyn jaqsartý qajet, veterınar mamandardy yntalandyrý sharalaryn qarastyrǵan jón. Veterınarııa salasynyń ınfraqurylymyn kúsheıtýge qatysty jumysty tıimdi túrde jalǵastyrý kerek», dedi Qasym-Jomart Toqaev.
