Jazýshylar jáne Jýrnalıster odaǵynyń múshesi, aqyn, ólketanýshy Sultanbek Qudaıbergen «Eleýli esimder» jobasy aıasynda óziniń qos kitabyn oraldyq oqyrmanǵa tanystyrdy. Onyń biri «Jan shyraǵy» atty óleńder jınaǵy qalamgerdiń óz shyǵarmalary bolsa, «Tartýym – dámi baldaı sózdiń jenti» atty jınaq ómirden qyrshyn ketken Bekqalı Qarabalınniń ómir jolyna arnalǵan.
«Bekqalı Qarabalınniń esimin búginde ádebıet zertteýshileriniń ózi bile bermeıdi. Mańǵystaýdan Oral qalasyna 1936 jyly 16 jasynda kelgen talantty jas az ýaqyt ishinde osyndaǵy ádebıet úıirmelerine belsene qatysqan. Oblystyq «Ekpindi qurylys» gazetinde kóptegen shyǵarmasy jarııalanǵan. Sol kezdiń ózinde aqyn retinde tanylyp, 1938 jyly batysqazaqstandyq qalamgerler sapynda Jambyl shyǵarmashylyǵynyń 75 jyldyǵyna, 1939 jyly Qazaqstan jazýshylary men halyq aqyndarynyń ekinshi sıezine qatysady. Odaq hatshysy Sábıt Muqanovtyń keńesimen Almaty qalasyna barady. Átteń, talantty aqynnyń ǵumyry tym qysqa bolypty. Nebári 21 jasynda qan maıdanda qaza tapqan. Aqyn Bekqalı Qarabalın arada 86 jyl ótkende Oral topyraǵyna kitap bolyp oralyp otyr. Jıyrmadan asqan jasynda joǵalǵan qazaq jyrynyń bir jebesin izdep taýyp, murasyn túgendegen Sultanbektiń eńbegi eren!» dedi Qadyrsaraı dırektory Dáýletkereı Qusaıynov.
Kezdesýde kesh ıesimen qatar taǵy bir mańǵystaýlyq aqyn, «Shabyt» festıvaliniń laýreaty Ánýarbek Bımaǵambet te sóz alyp, sahnadan óleń oqydy. Meımandarǵa «Qadyr» jýrnalynyń alǵashqy sany syıǵa tartylyp, Batys Qazaqstan oblystyq mádenıet basqarmasynyń basshysy Qýanyshbek Muqanǵalıevtiń alǵyshaty tapsyryldy.
Aqyn, ólketanýshy Nurlan Sádir jańa jınaqqa sholý jasap, avtordyń keıbir shýmaqtaryn oqyp berdi. Kesh ıesi Sultanbek Qudaıbergen Jaıyq jurtynyń ystyq yqylasyna iltıpat bildirip, uıymdastyrýshylarǵa alǵys aıtty.
Batys Qazaqstan oblysy
