Pılotsyz ushý apparattary joldaǵy tártipti baqylaýdyń tıimdi quralyna aınaldy. Kamerasy bar drondar erejeniń buzylýyn sol sátte tirkep, kúrdeli jol ýchaskelerin joǵarydan baqylaıdy. Jınalǵan derekter jyldam polısııaǵa jetkiziledi.
20 shaqyrymǵa deıingi ushý qashyqtyǵy magıstraldardy da, qoljetimsiz aýmaqtardy da tolyq patrýldeýge múmkindik beredi. Osyndaı qadaǵalaý nátıjesinde alty myńnan astam zańbuzýshylyq anyqtaldy. Áýeden baqylaý jol-kólik oqıǵalarynyń aldyn alyp, qaýipti jaǵdaıǵa der kezinde áreket etýge jol ashady.
Konsertter, sporttyq matchtar jáne merekelik is-sharalar kezinde drondar qoǵamdyq tártipti qamtamasyz etetin negizgi quralǵa aınaldy. Kameralar halyq kóp jınalǵan jerlerdegi jaǵdaıdy baqylap, kúmándi áreketterdi erte anyqtaıdy. Polısııa jasaqtary qajetti aýmaqqa tez jete alady.
Pılotsyz apparattar jedel qyzmet kezinde de jıi qoldanylady. Olar oqıǵa ornyn qaraýǵa, joǵalǵan adamdardy izdeýge, qylmys izderin túsirýge jáne jaǵdaıdy naqty ýaqyt rejıminde baqylaýǵa kómektesedi. Aerofototúsirilim men beınetirkeý dálelderdiń sapasyn arttyryp, tergeý jumysyn jedeldetedi.
Shymkentte ótken «Qarasora» jáne «Quqyqtyq tártip» is-sharalary osynyń aıǵaǵy. Dron arqyly sıntetıkalyq esirtki satty degen kúdikpen júrgen 44 jastaǵy áıeldiń qozǵalysy baqylanyp, ol qylmys ústinde ustaldy. Kóliktiń júksalǵyshynan eki keliden astam esirtki tabyldy.
Pılotsyz apparattardy paıdalaný – Ishki ister mınıstrliginiń sıfrlyq jańǵyrtý baǵdarlamasynyń bir bóligi. Drondar polısııanyń kúndelikti jumysyn jeńildetip, qoǵamdyq tártipti qorǵaýǵa, jol qaýipsizdigin arttyrýǵa jáne qylmystardy tez ashýǵa naqty kómek kórsetip otyr.
