Kompanııa resmı Telegram-arnasynda jańa talaptardyń 20 qarashadan bastap kúshine enetinin jarııalady. О́zgerister lıtıı-ıondy batareıalarǵa qatysty qaýiptiń aldyn alýǵa jáne jolaýshylardyń qaýipsizdigin arttyrýǵa baǵyttalǵan.
Power bank – smartfon, planshet, noýtbýk jáne basqa da elektrondy qurylǵylardy qýattaıtyn portatıvti akkýmýlıator.
Negizgi jańa talaptar:
- Bortta syrtqy akkýmýlıatorlardy qoldanýǵa tolyq tyıym salynady;
- Power bank-ti ushaqtyń ishki elektr júıesine qosýǵa bolmaıdy;
- Qurylǵylardy ústińgi sórelerge qoıýǵa ruqsat joq, olar jolaýshyda - ekıpaj jyldam qol jetkize alatyndaı jerde bolýy kerek;
- Qýattylyǵy 100 vatt-saǵatqa deıingi bir ǵana zaýyttyq power bank-ti qol júginde alyp júrýge ruqsat;
- Qýaty 100-160 vatt-saǵat aralyǵyndaǵy qurylǵylardy tek kompanııanyń aldyn ala kelisimimen alyp júrýge bolady.
Azerbaijan Airlines osylaısha syrtqy akkýmýlıatorlardy tasymaldaý erejelerin qataıtqan taǵy bir tasymaldaýshy boldy. Buǵan deıin birqatar iri áýe kompanııalary osyndaı shekteýler engizgen.
Buǵan deıin Emirates 1 qazannan bastap power bank-ti qoldanýǵa tolyq tyıym saldy. Qol júginde bireýin alyp júrýge bolady, biraq ushý kezinde paıdalanýǵa bolmaıdy.
Air Astana men FlyArystan da erejelerin jańartty: barlyq qosymsha lıtıı batareıalar — sonyń ishinde power bank tek qol júginde tasymaldanady. Tirkelgen bagajda alyp júrýge tyıym salynǵan.
