– Bul – jyl saıyn kúz-qys mezgilinde aınalymda júretin, burynnan belgili H3N2 shtammyna jatatyn maýsymdyq A tumaýy, – dedi ınfeksıonıst.
Dáriger naýqastarda jıi kezdesetin belgilerdi atady.
– Ol – dene qyzýynyń kóterilýi, murynnyń bitelýi, álsizdik, jótel. Aýrýhanaǵa jatqyzylǵan naýqastyń jaǵdaıyna qaraı emdeý hattamasyna sáıkes em júrgiziledi. JRVI, tumaýdyń epıdemıologııalyq maýsymynda qalalyq emhanalarda súzgi bólimi jumys jasaıdy. Jeńil jaǵdaıdaǵy naýqastar, aýyrǵanyna 1-2 kún bolǵan jáne qosalqy aýrýlary bolmaǵan jaǵdaıda emhanaǵa júgine alady, – dedi Madııar Ermekuly.
Infeksıonıst aldyn alý sharalaryna mán berýge shaqyrdy.
– Jeke bas gıgıenasyn saqtaý mańyzdy. Mektep oqýshylary men eresek adamdar qolyn jıi sabyndap jyly sýmen jýýy, aýyz qýysyn shaıýy, úıdi jeldetip otyrýy kerek. Balany jasyna saı qunarly tamaqtandyryp, jyly sýdy kóbirek ishkizý qajet, – dedi maman.
Dáriger dárýmenderdi qoldanýǵa qatysty keńes berdi.
– Aǵzada tapshylyq bolǵanda ǵana dárýmen ishý kerek. Nusqamasyz dári qabyldaýǵa bolmaıdy, – dep aıtty Madııar Ermekuly.
Maman maýsymdyq jaǵdaıǵa baılanysty dári tapshylyǵy bolyp jatqanyn jasyrmady.
– Jaqynda dárihanalardan oseltamıvırdi tappadym. Bul – bizge qajet dári. Densaýlyq saqtaý mınıstrligi dárihanalarǵa revızııa jasap, qajet dárilerdi kóbeıtýi kerek. Ata-analar Almatydan, jan-jaqtan qarap, alyp jatyr. Mundaı jaǵdaı bolmaýy kerek. Osal toptarǵa, esepte turǵan jandarǵa, 5 jasqa deıingi balalarǵa qoljetimdilikti arttyrý, múmkin bolsa, baǵasyn túsirý qajet, – dedi ınfeksıonıst.
