2025 jyldyń basynan beri IIM «Dármek» jedel-profılaktıkalyq is-sharasynyń úsh kezeńin ótkizdi. Onyń aıasynda esirtki qylmysyna qarsy is-qımyl komıtetiniń qyzmetkerleri medısınalyq mekemeler men jeke dárihanalardy tekserdi. Negizgi nazar memlekettik baqylaýǵa jatatyn preparattardy saqtaý, esepke alý jáne satý erejeleriniń saqtalýyna aýdaryldy.
– 1200 medısınalyq mekeme tekserildi. Nátıjesinde kóptegen zańbuzýshylyqtar anyqtaldy, onyń ishinde kúshti áser etetin dárilerdi reseptisiz satý faktileri bar. Tekserý qorytyndysy boıynsha 1000-nan astam materıal jasalyp, kináli tulǵalardy ákimshilik jaýapkershilikke tartý úshin Densaýlyq saqtaý mınıstrliginiń aýmaqtyq medısınalyq jáne farmasevtıkalyq baqylaý departamentterine joldandy, – dedi IIM esirtki qylmysyna qarsy is-qımyl komıteti basqarmasynyń bastyǵy Baqytjan Ámirhanov.
Jalpy aıyppul somasy 150 mıllıon teńgeden asty.
Ámirhanovtyń aıtýynsha, 2026 jyldyń 1 qańtarynan bastap kúshti áser etetin zattardyń zańsyz aınalymy úshin qylmystyq jaýapkershilik engiziledi. Ol qoldanystaǵy zań talaptaryn qatań saqtaý qajettigin eske saldy.
