Jurt jaqsy kóretin halyq ánderin ásem daýysymen áýelete oryndaǵan ánshi el yqylasyna bólendi. Alaıda tanymal daraboz jurt unatqan dástúrli ánderdi ǵana oryndaýmen shektelgen joq. Oǵan «Er Tarǵyn», «Aıman-Sholpan», «Qyz Jibek», «Birjan-Sara», «Abaı» operalarynda kúrdeli partııalar men rólderdi oryndaý júkteldi. О́zi de birneshe án shyǵardy.
Qazaqtyń dástúrli án ónerin janyndaı súıgen ánshiniń daýysy da erekshe edi. Birde aspanǵa áýelep, endi birde baıaý soqqan samaldaı estiledi. Onyń osyndaı áýezdi úni kezinde gramplastınkaǵa jazyldy. Atyraý oblystyq tarıhı-ólketaný mýzeıinde sondaı plastınkanyń birnesheýi saqtalyp tur. Sonyń birinde Ǵarıfolla Qurmanǵalıevtiń oryndaýyndaǵy «Smet», «Jylyoı», «Seri jigit áni, «Eki jıren», «Ádemi qyz» ánderi jazylǵan.
Kezinde mundaı gramplastınkalardaǵy ánderdi tyńdaý úshin arnaıy patefon shyǵaryldy. Osyndaı patefondy tenor daýysty ánshi de ustaǵan eken. Qazir munaıly óńir mýzeıine qoıylǵan bul patefon kelýshilerdi erekshe qyzyqtyrady.
«Jyldar jyljyǵan saıyn el yqylasy aýǵan tanymal tulǵalar, ásirese ult ónerin damytýǵa zor úles qosqan darabozdar ustaǵan zattardyń qadiri arta beredi. Mýzeıge kelgen saıyn batys aımaqtaǵy halyq ánderiniń, Muhıt týyndylarynyń keıingi urpaqqa jetýine aıryqsha septigi tıgen ánshiniń buıymdaryn qyzyqtaımyn», deıdi jergilikti qalamger Qarjaýbaı Sultanǵalıuly.
Atyraý oblysy
