Juma kúni eki keshtiń arasynda qazaq óleńi qara jamyldy. Tóbemizden jaı túskendeı kúı keshtik. Shyn aqyndy, shynaıy talantty búkil qazaq dalasy egile joqtap turdy. Jambyl jurtshylyǵy da jabyrqap, kóńilsiz kúıge tústi.
Kúlásh Ahmetova apaıymyz bárimizge, ásirese, jastarǵa janashyr qasıetti kisi edi. Aqynnyń keıingi jyldary Taraz qalasynda turyp, eldiń ortasynda bolǵany da bárimiz úshin mereı, mártebe bolatyn. Jary Qaıyrbek Asanov aǵamyz ekeýi berekeli ǵumyr keshti. Qos aqynnyń bir-birine degen izet-qurmeti qandaı keremet edi. Kúlásh apaıymyzdyń jany meıirimdi, jyrlary móldir, ómiri shýaqty jan boldy. Talaı ret dastarqanynan dám tattyq, qurmetin kórdik, qoldaýyn sezindik. Analyq appaq meıirimi árqashan janymyzdy tolqytyp turatyn. Bir ǵajap qasıeti – óte táýbeshil, biraq shynshyl, taza jan edi. Bir adam týraly jaman sóz aıtqanyn kórgen emespiz. Únemi ózinen góri ózgeni talantty, myqty dep otyratyn. Aqyndyǵy qandaı bıik bolsa, adamdyǵy da sondaı bıik tulǵa edi.
Qarashanyń qusy qaıtqan kóńilsiz shaqta Kúlásh Ahmetova apaıymyzdy aqtyq saparǵa shyǵaryp saldyq. Asyl adamdy qara jerge qımadyq. О́zi aqyn kóńilimen jaqsy kórgen, jyrlaǵan erke Talas ózeniniń boıynan máńgilik mekenin tapty. Qazaq rýhanııaty bar kezde Kúlásh Ahmetova esimi umytylmaıdy. Aıaýly aqyndy biz de umytpaımyz. Suhbattarynda ylǵı da meniń atymdy aıtyp, úmit kútemin deıtin. Sondaı ǵajap tulǵanyń kózin kórip, jaqsy sózin tyńdaǵanym úshin ózimizdi baqytty sanaımyz. Aqyn esimi árqashan júrek tórinde. Umytpaımyz.
Hamıt Esaman,
Jambyl oblysy ákiminiń keńesshisi,
Jazýshylar odaǵynyń
Jambyl oblysyndaǵy ókili
