Memlekettik qoldaýdyń tıimdiligin sezingen kásiporyndardyń biri – «Sigma Corporation» JShS. Bul kompanııa elimizde kabelderdiń barlyq túrine arnalǵan mýftalardy óndiretin biregeı zaýyt sanalady. О́nimderi elektr jelileriniń qaýipsizdigin qamtamasyz etip, montajdaý jumysyn jeńildetedi. 2010 jyly qurylǵan kásiporyn búginde 50-den astam adamdy turaqty jumyspen qamtyp otyr. О́ndiris áleýetin arttyrýdy josparlaǵan kompanııa 2023 jyly «Damý» qorynyń sýbsıdııalaý baǵdarlamasy boıynsha aınalym qarajatyn tolyqtyrý maqsatynda nesıe alǵan. Sosyn memlekettik qoldaýdyń arqasynda jyldyq 13,25 paıyzyn memleket esebinen ótetken.
– «Damý» qorynyń qoldaýy arqasynda óndiristik bazamyzdy jańa deńgeıge kóterip, eki jańa tehnologııalyq jelini iske qosýǵa múmkindik aldyq. Qazir jabdyqtar ornatylyp, synaqtan ótkizilip jatyr, – deıdi kompanııanyń kommersııalyq dırektory Ksenııa Rýsakova.
Kásiporynnyń aldaǵy jospary da aýqymdy. 2026 jylǵa deıin jalpy aýdany 1 800 sharshy metr jańa óndiristik seh salý kózdelgen. Bul joba óndiris kólemin ulǵaıtyp, jańa jumys oryndaryn ashýǵa jáne ımportqa táýeldilikti azaıtýǵa baǵyttalǵan. Eń bastysy, paıdalanylatyn shıkizattyń basym bóligi otandyq ónim.
Qaraǵandylyq «WEC Trade» kompanııasy – avtohımııa salasyndaǵy otandyq brendterdiń biri. Isti 2016 jyly jeke avtojýý ortalyqtaryna arnalǵan quraldar shyǵarýdan bastaǵan kásiporyn búginde ekologııalyq taza, densaýlyqqa zııansyz jáne halyqaralyq standarttarǵa saı ónim óndiretin zamanaýı zaýytqa aınaldy. Qazirgi ýaqytta kompanııa 90-ǵa jýyq túrli ónim shyǵarady. 2025 jyly joba «О́rleý» jeńildetilgen nesıe baǵdarlamasy arqyly 120 mıllıon teńgege qarjylandyrylyp, «Kepildik qory – 1» baǵdarlamasy boıynsha 29 mıllıon teńge kepildikke ıe boldy. Bul qarajat óndiristik qýatty keńeıtip, jańa jumys oryndaryn ashýǵa jol ashty.
– Bizdiń jýý quraldarymyz ekologııalyq turǵydan qaýipsiz, baǵasy qoljetimdi. Aı saıyn shamamen 120 tonna ónim shyǵaramyz. Qaraǵandy, Almaty, Jezqazǵan, Astana qalalarynda qoımalarymyz bar. Qazir ónimderimiz Wildberries pen Ozon marketpleısteri arqyly satylady,– deıdi kompanııanyń marketologi Dına Bedelbaeva.
Kompanııa jýyrda qaladaǵy qoǵamdyq oryndarda paıda bolǵan boıaý izderin ketirýge arnalǵan arnaıy suıyqtyq jasap shyǵarǵan. Bul olardyń zertteý jáne ınnovasııalyq áleýetiniń joǵary ekenin dáleldeıdi.
О́ńirdegi taǵy bir tabysty kásiporyn – «Kotly KZ» JShS. Kompanııa «Gornıak» markasymen avtomatty jylytý qazandyqtaryn shyǵarady. Búginde elimizden bólek, Reseı men Qyrǵyzstan naryǵyna da ónim eksporttap otyr. О́nim jelisine kómirmen, gazben jáne elektrmen jumys isteıtin qazandyqtar, monsha peshteri, avtomatıka júıeleri men sorǵylar kiredi. Kompanııanyń óz patentteri bar, al óndiris úderisinde Germanııadan ákelingen KUKA dánekerleýshi roboty qoldanylady.
2023 jyly kásiporyn «2021–2025 jyldarǵa arnalǵan Kásipkerlikti damytý jónindegi ulttyq joba» aıasynda «Bank RBK» arqyly nesıe alyp, qarajatty óndiristik ǵımaratty satyp alý men jańǵyrtýǵa jumsady. Ol somany «Damý» qory jyldyq 12,75 paıyzdyq mólsherlemeni sýbsıdııalady. Qazir kásiporynda 300-ge jýyq adam eńbek etedi. Olar jyl saıyn 15 myńnan astam jylytý qurylǵysyn shyǵarady.
– Memleket pen «Damý» qorynyń qoldaýy arqasynda óndiristi bir núktege shoǵyrlandyryp, barlyq úderisti 30 paıyzǵa tıimdi ettik. Bıznes damýy úshin mundaı qoldaý – baǵa jetpes múmkindik, – deıdi kásiporyn basshylyǵy.
Qaraǵandy óńiri boıynsha biz atap ótken úsh kásiporyn – memlekettik qoldaýdyń naqty nátıjesin kórsetetin jarqyn mysaldar. Innovasııa, sapa, eńbekqorlyq toǵysqanda ekonomıkalyq serpin de, áleýmettik turaqtylyq ta arta túsedi. «Damý» qorynyń baǵdarlamalary kásipkerlerge tek qarjylaı demeý emes, sonymen birge óndiris mádenıetin jańǵyrtyp, otandyq ónimniń sapasyn halyqaralyq deńgeıge kóterýge múmkindik berip otyr.
Qaraǵandy oblysy
