Memleket basshysy Q.Toqaev Túrkistan tórinde ótken Ulttyq quryltaıda: «Elimiz úshin strategııalyq mańyzy bar taǵy bir másele – shekaralas aımaqtardy damytý», degen edi. Osy oraıda Abaı oblysyndaǵy Maqanshy aýdanynyń jóni bólek. О́ńirdiń ekonomıkalyq ósýi, halyqtyń turaqtanýy asa mańyzdy. Bıylǵy 9 aıdyń qorytyndysy boıynsha Maqanshy aýdanynyń negizgi kapıtalyna salynǵan ınvestısııa kólemi ótken jyldyń sáıkes kezeńimen salystyrǵanda 147,3%-ǵa artqan. Bul ósim aýdannyń turaqty damýyn, ınvestısııalyq tartymdylyǵynyń artyp kele jatqanyn aıǵaqtaıdy. Bul jóninde Maqanshy aýdanynyń ákimi Dáýren Qoıgeldın baıandady.
– Aýdanda birqatar iri ınvestısııalyq jobalar júzege asyrylyp jatyr. Baqty aýylynda kólik-logıstıkalyq habtyń qurylysy bastaldy. «Di-Nur Company» JShS jalpy quny 7 mlrd teńge bolatyn maı óndirý, qurama jem zaýytynyń qurylysyn júrgizip jatyr. Sondaı-aq «Qazaq Oil», «Royal Petrol», «Lýkoıl» kompanııalary janar-jaǵarmaı quıý stansalaryn saldy. Buǵan qosa Memleket basshysynyń Joldaýynda aıtylǵan «Baqty – Aıagóz» temirjoly men «Baqty» ótkizý beketin jańǵyrtý jobalary aýdannyń kólik-logıstıkalyq áleýetin arttyryp, ekonomıkalyq serpin bereri sózsiz, – deıdi aýdan ákimi.
Aýdandaǵy qurylys salasynda da oń nátıje baıqalady. Paıdalanýǵa berilgen turǵyn úı kólemi 7 379 sharshy metrge jetken. Sonymen qatar áleýmettik osal toptaǵy azamattardy turǵyn úımen qamtamasyz etý maqsatynda 59 jeke úıdiń (118 páter) qurylysy júrgizilip jatyr.
– Jol jáne ınfraqurylym salasynda da aýqymdy jumys atqarylady. 1 mlrd 755 mln teńge qarjyǵa 41 shaqyrym jol jóndeý jumysy júrgiziledi. Atap aıtqanda, Maqanshy, Kókterek, Qyzylbulaq, Keldimurat, Qaratuma, Baqty aýyldarynyń kóshelerinde ortasha jóndeý jumysy qolǵa alynǵan. Maqanshy aýylyndaǵy Jeńis saıabaǵy men Qabanbaı batyr eskertkishi mańynda demalys aımaqtary jańǵyrtylyp, kóshe jaryqtandyrý júıeleri ornatyldy. Bul is-sharalar aýdannyń kelbetin jaqsartyp, turǵyndardyń ómir súrý sapasyn arttyrýǵa baǵyttalǵan, – deıdi aýdan ákimi.
Ákimniń málimetinshe, halyqtyń kóp demalatyn oryndarynyń biri – Alakólde jyldan-jylǵa demalýshylar sany artyp keledi. Birneshe jyldan qordalanyp qalǵan problemalardy sheshý, týrısterge sapaly qyzmet kórsetý maqsatynda oblystyq bıýdjetten jóndeý jumystaryna 87,1 mln, jaǵalaýdy abattandyrý jumystaryna 86,0 mln, jaǵalaýǵa 7 pırs, 7 qutqarý munarasyn, 5 shaqyrym jaǵalaýǵa túrli-tústi qalqyma ornatýǵa 37,2 mln, jańadan qoǵamdyq keńistik ornatýǵa 165,8 mln teńge qarjy bólinip, jumystary jasalǵan.
Aýdan ákiminen Alakóldegi káriz júıesin, Barlyq arasanynyń janyndaǵy demalys saýyqtyrý orynynyń jaıyn, Baqty aýylyndaǵy apatty jaǵdaıda dep tanylǵan mekteptiń ahýalyn surap bildik. Ákim óz sózinde Alakóldegi káriz júıesin ornatý máselesi qolǵa alynǵanyn, sol sekildi Barlyq arasanynda qaıta qalpyna keltirýge baılanysty jumys júrip jatqanyn aıtty. Baqty aýylyndaǵy mektep jóndeýden ótken, qazir alańdaýǵa negiz joq.
Abaı oblysy
