Birinshi kezekte mamandandyrylǵan Qalalyq balalar klınıkalyq ınfeksııalyq aýrýhanasynda (QBKIA) balalarǵa táýlik boıy kómek kórsetile bastady. Aýrýhana negizgi korpýs pen eki fılıaldan turady. Uıym 18 jasqa deıingi balalarǵa ınfeksııalyq aýrýlar boıynsha shuǵyl túrde, tegin medısınalyq kómektiń kepildik berilgen kólemi (TMKKK) aıasynda qyzmet kórsetedi.
«Balalarǵa JRVI men tumaýǵa qarsy em júrgizý úshin ınfeksııalyq aýrýhanada 536 tósekke arnalǵan 14 bólimshe ashylǵan, olardyń ishinde 48 reanımasııalyq tósek bar. Sońǵy aptadaǵy tósek qoryna túsken júkteme shamamen 51% boldy. Qajet bolǵan jaǵdaıda epıdemıologııalyq jaǵdaıǵa baılanysty qosymsha qordaǵy 92 tósek-oryn qosylýy múmkin», deıdi Almaty qalasy Qoǵamdyq densaýlyq basqarmasy basshysynyń orynbasary Láıla Imanǵalıeva.
Stasıonarlyq júkteme boıynsha balalar arasynda alǵashqy orynda tumaý men JRVI, odan keıin pnevmonııa tur. QBKIA stasıonarlarynda JRVI jáne tumaýmen 274 bala emdelip jatyr, olardyń 139-yna pnevmonııa dıagnozy qoıylǵan. Aýrýhanada ınfeksııalardy jedel anyqtaýǵa múmkindik beretin zerthana bar.
S.Jekenova atyndaǵy qalalyq klınıkalyq ınfeksııalyq aýrýhanada eresek turǵyndarǵa medısınalyq kómek kórsetiledi. Munda JRVI jáne tumaýmen aýyratyndarǵa arnalǵan 280 tósegi bar 5 bólimshe jumys isteıdi, onyń ishinde 9 tósek – reanımasııada. Qajet bolǵan jaǵdaıda qosymsha 100 tósek ashylýy múmkin. 2025 jyldyń 17 qarashasyndaǵy jaǵdaı boıynsha stasıonarda 203 JRVI dıagnozy bar naýqasqa qosa, pnevmonııadan 6 eresek adam em qabyldap jatyr.
Al №4 qalalyq perzenthanada júkti áıelderge mamandandyrylǵan kómek kórsetiledi. Júktiligi 28 aptadan asqan áıelderge JRVI men tumaýǵa qarsy em júrgizýge arnalǵan 70 tósek ashylǵan, olardyń ishinde 6 reanımasııalyq tósek bar. Epıdemıologııalyq jaǵdaıdyń ózgerýine qaraı qosymsha 10 rezervtik tósek ashýǵa múmkindik bar.
Qoǵamdyq densaýlyq saqtaý basqarmasy tósek-oryn qoryn baqylap otyrady. Infeksııalyq stasıonarlarda rezervtik tósek qory qarastyrylǵan. Qajet bolǵan jaǵdaıda tósek sanyn jedel arttyrýǵa bolady. Medısınalyq uıymdar tósek qoryn qaıta beıimdeý, em alýshylardy baǵyttaý josparlaryn ázirlegen, bul epıdemıologııalyq jaǵdaıda jedel áreket etip múmkindik beredi.
«Emhanalarda emdelýshilerge JRVI men tumaýǵa «fıltr-kabınetter» arqyly kómek kórsetiledi. Onda ınfeksııa belgileri bar adamdardy qabyldap, aýrýdyń taralý qaýpin azaıtady. Sondaı-aq úıge shyǵatyn mobıldi brıgadalar jumys isteıdi. Bastapqy medısınalyq sanıtarlyq kómek júıesi maýsymdyq syrqattanýdyń ósý kezeńinde kúsheıtilgen baqylaýmen josparly rejımde qyzmet atqarady», dedi spıker.
Júkti áıelder men bir jasqa deıingi balalarǵa erekshe kóńil bólinedi. Bul sanattaǵy naýqastar úıge shaqyrtqanda birinshi kezekte qabyldap, turaqty patronaj jáne qajet bolǵan jaǵdaıda ýaqtyly sharalar usynylady.
