– Men Qazaqstannan, Aqtóbe qalasynanmyn. Meni tek ata-anam ǵana emes, ata-ájem de tárbıeledi. Bala kezimizden men, qaryndasym, inim úsheýmiz halqymyzdyń dástúrleri jaıly kóptegen áńgimeler tyńdap óstik. Úlkender bizge maqal-mátelderdiń mánin túsindirip, ótkenniń danalyǵyn án-kúı arqyly – dombyra, qobyz jáne ulttyq aspaptarda oryndalatyn dástúrli ánder men kúıler arqyly úıretti.
Bizdiń elimiz de Mysyr sııaqty kóne tarıhqa ıe, biraq zamanaýı álemmen birge ilgerilep keledi. Sondyqtan, ıá, men eki halyq arasynda erekshe rýhanı baılanys baryn sezinemin. О́tkenimiz bolmasa, búginimiz de bolmas edi.
– Pıramıdalar týraly alǵash ret qashan estidińiz?
– Alǵash ret pe? Árıne, óte ertede – bálkim, ótken ǵasyrda shyǵar! (kúldi) Naqty esimde joq, biraq Pıramıdalardy alǵash mýltfılmder men balalar kitaptarynan kórdim dep oılaımyn. Keıinirek mektepte Ejelgi Mysyr tarıhyn oqydyq.
– Pıramıdalar men ejelgi Mysyr órkenıeti Siz úshin neni bildiredi?
– Olar men úshin mádenıet pen danalyqtyń nyshany. Olar Mysyr tarıhynyń qanshalyqty tereń ári baı ekenin kórsetedi. Osyndaı tamasha murany saqtap, álemmen bólisip otyrǵandaryńyzǵa úlken qurmetpen qaraımyn.
– Bul Sizdiń Mysyrdaǵy alǵashqy konsertińiz be? Týrıst retinde osy elge buryn-sońdy kelip pe edińiz?
– Iá, Mysyrǵa alǵash ret kelýim. О́kinishke qaraı, buǵan deıin týrıst retinde de bolmaǵan ekenmin. Sondyqtan dál qazir osynda bolyp, osy festıvalde elimizdiń mádenıetin tanystyryp otyrǵanyma óte qýanyshtymyn.
– Sizdiń oıyńyzsha, mýzyka halyqtar men mádenıetterdi jaqyndastyrýda qandaı ról atqarady? О́ner men mádenıet álemdegi úılesimdilikti saqtaýǵa kómektesedi dep oılaısyz ba?
– Álemniń kez kelgen jerindegi – Qazaqstandaǵy, Eýropadaǵy nemese Amerıkadaǵy bolsyn konsertterimniń birine kelseńiz, ártúrli elderden jınalǵan adamdardyń birge otyrǵanyn kóresiz. Olar túrli tilderde án aıtady: qytaılyq jankúıerler – oryssha, ıspandyqtar – fransýzsha, al barlyǵy birge qazaqsha án shyrqap jatqanyn kóresiz. Meniń ǵajaıyp Dears jankúıerlerim – mýzykanyń sózsiz-aq qanshama júrekterdi biriktire alatynynyń eń jaqsy dáleli.
– «Pıramıdalar jańǵyryǵy» festıvali jónindegi áserińiz qandaı? Bul festıvaldiń alǵashqy shyǵarylymyna qatysý Sizge qandaı áser syılaıdy?
– Dál osy jańa halyqaralyq jobanyń bir bóligi bolǵanyma óte qýanyshtymyn. Bul alǵashqy festıval osynaý kóne tarıhqa toly ásem ólkede ótetin kóptegen sharalardyń bastaýy bolady dep úmittenemin.
– Pıramıdalar janyndaǵy konsertterińizdi asyǵa kútip otyrǵan mysyrlyq jankúıerlerińizge jáne Mysyrda turatyn qazaq dıasporasyna aıtaryńyz bar ma?
– Munda ómir súrip jatqan barlyq qazaqtarǵa jáne Qazaqstan mádenıetine qyzyǵýshylyq tanytatyn, alystaǵy elden kelgen barlyq jankúıerlerime eń jyly sálemimdi joldaımyn. Maǵan jańa kontınentte óz Otanymdy tanystyrý — zor mártebe ári úlken qýanysh. Qoldaýlaryńyz ben súıispenshilikterińiz úshin alǵys aıtamyn.
Bıletterdi Tazkarti Events platformasynan satyp alýǵa bolady.
