Shaǵantoǵaıdaǵy Úrjar kúnderi

Memleket basshysynyń óńir­aralyq ıntegrasııany damytý jónindegi tapsyrmasyna oraı, shyǵysqazaqstandyqtar shekaralas Qytaı eliniń sýbektilerimen kórshilik qarym-qatynastardy tereńdetip keledi. Buǵan deıin Qytaıdyń Sháýeshek, Dórbiljiń, Jemeneı, Altaı sııaqty aımaq­tary men qalalarynda eki­jaqty áriptestikti jetildirý jóninde birqatar saparlar uıymdastyrylǵan bolatyn. Qytaı eliniń delegasııalary da Shyǵys Qazaqstan óńirine jıi kelip, iskerlik hám mádenı qarym-qatynastardy jandandyra túsýge qumbyl bolyp otyr. Oblystyq týrızm jáne syrtqy baılanystar basqarmasynyń uıytqy bolýymen ótken aptada Qytaıdyń ShUAR Tarbaǵataı aımaǵynyń Shaǵantoǵaı aýdanynda Úrjar aýdanynyń kúnderi ótti. Aýdan basshylary, ónerpazdary men shyǵarmashylyq ujymdary jáne kásipkerlerden quralǵan resmı delegasııany Úrjar aýdanynyń ákimi Serik Zaınýldın bastap bardy. Qazaqstandyq meımandardy Shaǵantoǵaı aýdany partııa komıtetiniń bas hatshysy Szy Ýy Bı bastaǵan aýdan basshylary kútip aldy. Aldymen taraptar arasynda resmı kezdesý ótti. Shaǵantoǵaı aýdany partııa komıtetiniń bas hatshysy kórshi ornalasqan Úrjar aýdanymen aradaǵy eki jaqty baılanysty damytýǵa múddeli ekendikterin jetkizdi. Úrjar aýdanynyń ákimi S.Zaınýldın qos aýdan arasyndaǵy baılanys Uly Jibek jolynyń boıynda ornalasqan Qazaqstan men Qytaı elderiniń arasyndaǵy dostyq qarym-qatynastardan bastaý alatynyn, elimizdiń Táýelsizdigin alǵan shırek ǵasyrǵa jýyq ýaqytta óte aýqymdy jumystar atqarylǵanyn, eki eldiń arasyndaǵy 2002 jyly 23 jeltoqsanda qol qoıylǵan qujatqa baılanysty damý baǵdar­lamasy aıqyndalǵanyn atap ótti. – Búginde qos aýdan arasynda aýyl sharýashylyǵy, densaýlyq saqtaý, sport, týrızm salasyn damytýda birqatar jumystar atqaryldy. Úrjar – eki jarym mln. gektardaı jeri, Tarbaǵataıdaı taýy, Alakóldeı kóli, Barqytbeldeı beli, Barlyq-Arasandaı shıpaly sýy bar, tabıǵaty óte qolaıly úlken aýdan. Byltyr bizde 30 mlrd. teńgeniń kólemindegi aýyl sharýashylyǵy ónimderi óndirildi. Aýdanda negizinen bıdaı, sút, et, bal, kúnbaǵys jáne zyǵyr maıy óndiriledi. Sondyqtan, ekologııalyq qunarly taza ónimderimizdi satyp, halyqtyń ıgili­gine jaratýdy kózdep otyr­myz, – dedi aýdan ákimi S.Zaınýldın. Kezdesý sońynda qos aýdan basshylary ekijaqty kelisimge qol qoıdy. Atalǵan qujatta kórshi óńirlerdiń arasyndaǵy dostyq qatynasty jandandyrý, baýyrlas aýdandar retinde saýda-ekonomıkalyq, mádenı baılanys­tardy óristetý kózdelgen. Úrjardyń Shaǵantoǵaıdaǵy kúnderi aıasynda «Jaqsy dos. Jaqsy kórshi. Bizder jaqsy seriktes» atty kórkemóner máde­nıet almastyrý saýyq keshi ótti. Shaǵantoǵaı aýdanynyń mádenıet saraıynda eki kún qatarynan ótken konserttik keshte eki el aýdandarynyń ónerpazdary daıarlaǵan túrli án men bı, qoıylymdar jergilikti jurttyń kóńilin kóterdi. Kesh sońynda úrjarlyq Nurbol Sherýbaev pen shaǵantoǵaılyq Cha Tıan Tıan «Dýdar-aı» ánin qazaq jáne hanzý tilinde oryndap, kórermenderdiń qoshemetine ıe boldy. Shaǵantoǵaı aýdanynyń ortalyǵynda ótken jármeńkege on myńnan asa halyq jınaldy. Jármeńkede Úrjar aýdanyndaǵy Maqanshy, Besterek, Baqty, Qaratal jáne basqa da aýyldardyń fermerleri men kásipkerleri óz ónimderi men taýarlaryn usyndy. Búginde úrjarlyq saýdagerler men týrıster Qytaı eline barýǵa beriletin bir kúndik jáne úsh kúndik vızany tıimdi paıdalanyp júr. Qytaıda ekologııalyq taza ónimder retinde qazaqstandyq taýarǵa suranys joǵary. Sondaı-aq, úrjarlyq delegasııa Shaǵantoǵaı aýdanynda týrızmdi damytý maqsatynda salynǵan áıgili mesenat Baspaı Bapınniń murajaıymen, qazaqtyń alyp kıiz úıiniń qurylysymen, qarttar úıimen, jergilikti juńǵo emhanasymen jáne basqa da áleýmettik nysandarmen tanysty. Dýman ANASh, «Egemen Qazaqstan». О́skemen – Shaǵantoǵaı – О́skemen.