– Amerıka Qurama Shtattary men Prezıdent Donald Tramptyń, sondaı-aq atysty toqtatý týraly kelisimge qol jetkizilýine mańyzdy úles qosqan basqa elderdiń kúsh-jigerin joǵary baǵalaımyz.
Qarardyń qabyldanýy – Gaza sektoryndaǵy jaǵdaıdy sheshýge, taraptar arasyndaǵy senimdi qalpyna keltirýge jáne Taıaý Shyǵystaǵy turaqty beıbitshilikke baǵyttalǵan mańyzdy qadam, – dep jazdy elimizdiń SIM.
Vedomstvonyń habarlaýynsha, Qazaqstan BUU Jarǵysyna, Qaýipsizdik Keńesiniń tıisti qararlaryna, halyqaralyq gýmanıtarlyq quqyqqa jáne táýelsiz, ómirsheń jáne aýmaqtyq turǵydan birtutas Palestına memleketin qurýdy kózdeıtin «eki halyq úshin eki memleket» formýlasyna negizdelgen Taıaý Shyǵys máselesiniń beıbit, keshendi jáne ornyqty sheshilýin únemi qoldaıdy.
– Qazaqstan Ibrahım kelisimderi aıasynda barlyq seriktestermen, sonyń ishinde prosestegi negizgi dánekerlermen syndarly túrde ózara árekettesýge jáne jaǵdaıdy turaqtandyrýǵa, halyqqa gýmanıtarlyq koldaýdy arttyrýǵa jáne uzaq merzimdi saıası proseske jaǵdaı jasaýǵa baǵyttalǵan halyqaralyq kúsh-jigerge odan ári úles qosýǵa daıyn, – delingen málimdemede.
