Sýret: primeminister.kz
Oqıǵa ornyna qabyldanyp jatqan jedel sharalar týraly Tótenshe jaǵdaılar mınıstri Shyńǵys Árinov, Eńbek jáne halyqty áleýmettik qorǵaý birinshi vıse-mınıstri Asqarbek Ertaev, Densaýlyq saqtaý birinshi vıse-mınıstri Tımýr Sultanǵazıev, Ishki ister vıse-mınıstri Sanjar Ádilov, Energetıka vıse-mınıstri Qaıyrhan Tutqyshbaev, Oqý-aǵartý vıse-mınıstri Asylbek Ahmetjanov jáne «QazaqGaz Aimaq» AQ bas dırektory Baýyrjan Asqarov, Túrkistan oblysynyń ákimi Nuralhan Kósherov baıandama jasady.
Qaza tapqan azamattardyń otbasylaryna barlyq qajetti kómek kórsetilip jatyr. Aýrýhanaǵa túsken úsh adamnyń jaǵdaıy aýyr, olar jansaqtaý bóliminde. Qutqarýshylar kelgen sátte zardap shekkenderdiń biri, 1986 jyly týǵan azamat úıden óz kúshimen shyǵyp úlgergen. Onyń jaǵdaıy aýyr dep baǵalanyp otyr, denesiniń 12%-yn kúıik shalǵan. Taǵy eki zardap shegýshi – 1991 jáne 2018 jyly týǵan azamattar da, denesiniń 30% jáne 11% kúıigimen shuǵyl túrde aýrýhanaǵa jetkizildi, qazir olar О́JJ apparatyna qosylǵan. Jedel medısınalyq kómek kórsetý úshin Shymkentten sanıtarlyq avıasııa brıgadasy ushyp shyqty.
Vıse-premer ákimdikke jáne Eńbek jáne halyqty áleýmettik qorǵaý mınıstrligine qaza tapqandardyń otbasylaryna qajetti materıaldyq kómekti tolyq kólemde kórsetýdi tapsyrdy. Densaýlyq saqtaý mınıstrligine zardap shekkenderdiń jaǵdaıyn turaqty baqylaýda ustaý, qajet bolǵan jaǵdaıda sanıtarlyq avıasııany paıdalana otyryp, olardy Astana qalasyna jetkizýdi uıymdastyrý júkteldi. Ishki ister mınıstrligine adamdardyń qaza bolýyna qatysty sotqa deıingi tergeýdiń barysyn erekshe baqylaýǵa alý tapsyryldy. Tótenshe jaǵdaılar mınıstrligine óńirlerdiń ákimdikterimen birlesip, turǵyn úıler, ásirese HÁOT jatatyn otbasylardyń úılerine, jataqhanalar men hostelderge reıd júrgizý týraly tapsyrma berildi. Reıd barysynda pesh júıeleriniń jaǵdaıy tekserilip, aqaýlar anyqtalsa, olardy jedel túrde joıý qajet.
