Foto JI kómegimen jasaldy
Marqumnyń qyzy Beıbit Jumaǵalıeva bolǵan jaıtty Threads paraqshasynda jarııalady. Otadan keıin ońalmaǵan naýqastyń jaǵdaıyn dárigerlerge baıandaǵanda, «narkozdyń qalypty áseri» dep jaýap bergen. Dárigerler dál osy beıqamdyǵy úshin zań aldynda jaýap berýge tıis dep bel baılaǵan Beıbit Jumaǵalıev bolǵan oqıǵanyń mán-jaıyn Tengrinews.kz saıtyndaǵy áriptesimizge baıandap berdi.
«Anam sátti ótetinine sengen. Bul kúrdeli operasııa emes edi»
Naýqasqa nebári 1–2 santımetr bolatyn shaǵyn jaryq dıagnozy qoıylǵan. Dárigerler otanyń ómirge qaýip tóndirmeıtinin, tek josparly túzetý qajet ekenin aıtqan. Pasıentke kvotaǵa sáıkes tegin operasııa usynǵan. Sóıtip em alýshy Green Clinic-ti tańdaǵan.
Ota 11 qyrkúıekte jasalǵan. Marqum operasııa aldynda joǵarǵy deńgeıde tekserýden ótip, qajetti medısınalyq tor men quraldardy óz qarajatyna shetelden aldyrǵan.
Alaıda kelesi kúni áıeldiń jaǵdaıy kúrt nasharlaı bastaǵan. Álsizdik, júrek aıný, qan qysymnyń tómendeýi baıqalǵan. Týystary mamandarǵa qaıta-qaıta habarlasqanymen, «narkozdyń áseri», «mundaı belgiler otadan keıin bolýy múmkin» degen salǵyrt jaýaptarmen shektelgen.
«Biz anamyzdyń álsirep bara jatqanyn kórdik. Biraq eshkim naqty túsindirip bermedi», deıdi qyzy.
Keshke qaraı áıel jansaqtaý bólimine túsedi. Biraq týystarynyń aıtýynsha, onda da jaǵdaıdyń naqty sebebi aıtylmaǵan.
Jansaqtaý bólimine jóneltildi
13 qyrkúıekte týystaryna áıeldiń «jaǵdaıy turaqty» ekeni, tipti úıine shyǵarýǵa daıyndalyp jatqany habarlanady. Alaıda telefon arqyly sóılesken kezinde anasynyń áreń sóılep jatqanyn kórgen qyzy dereý ÝDZ jasaýdy talap etken.
Tekserý keshkisin ǵana júrgizilip, jaǵdaıdyń tym qıyndaǵany belgili bolǵan. Arterııalyq qysym qaýipti deńgeıge túsken.
Jedel otada dárigerler ash ishektiń shamamen 70 paıyzynyń óliettengenin anyqtap, onyń sebebin mezenterıaldy tromboz dep kórsetken.
Otadan soń áıel medıkamentozdy uıqyǵa jiberilgen. Týystarynyń aıtýynsha, hırýrg shamamen bir saǵattan keıin bólimsheden shyǵyp ketken. Túnde sol dáriger habarlasyp, áıeldiń qaıtys bolǵanyn estirtken.
Saraptamaǵa senimsizdik: «Derekterdiń ózi qate»
Týystar alǵashqy sot-medısınalyq qorytyndyda shyndyqqa sáıkes kelmeıtin kórsetkishter bar ekenin aıtady.
Olardyń jaldaǵan táýelsiz sarapshysy da qorytyndy tolyq jasalmaǵanyn, trombozdyń damý tetigi zerttelmegenin atap kórsetken.
Týystar mınıstrlikke shaǵym túsirgen. Alaıda vedomstvo ótinishti tekserý úshin ony keri aınaldyryp, sol klınıkanyń ózine qaıta jibergen. Marqumnyń balasy Ramazan Oraqbaı bul sheshimdi «múddeler qaqtyǵysy» dep baǵalaıdy.
Onyń aıtýynsha, uzaq shaǵymdanýdan keıin ǵana Komıtet klınıkaǵa tekserý júrgizýge daıyn ekenin habarlaǵan, biraq sol ýaqyt aralyǵynda klınıka ózderi tańdaǵan sarapshylardyń qorytyndysyn alyp úlgergen.
«Olar da kómek kórsetýdiń keshikkenin rastady. Al saraptama aktisiniń sapasy sonshalyqty tómen, ony sotta dálel retinde qoldanýdyń ózi qıyn», deıdi Ramazan.
Klınıkanyń ózi ne deıdi?
Green Clinic basshylyǵy resmı málimdeme jasap, tekserý zań aıasynda júrip jatqanyn jáne barlyq materıaldyń ashyq bolatynyn málimdedi.
Emdeý isi jónindegi orynbasar Álimjan Muhambetov keı asqynýlar aldyn ala boljanbaıtynyn atap ótip:
«Biz bul oqıǵany jasyrǵymyz kelmeıdi. Ár naýqastyń aǵzasy ártúrli. Keıbir qaýipti asqynýlardy boldyrmaý medısınada da múmkin bolmaı qalatyn jaǵdaılar kezdesedi», dedi.
Onyń aıtýynsha, bul oqıǵa saqtandyrý jaǵdaıy retinde tirkelgen. Táýelsiz sarapshylar da asqyný kezinde kórsetilgen kómektiń keshikkenin rastaǵan.
Týystar: «Bizdiń maqsat – kinálilerdiń jaýapqa tartylýy»
Marqumnyń jaqyndary istiń ashyq tergelýin jáne medısınalyq qyzmetkerlerdiń naqty jaýapqa tartylýyn talap etip otyr.
«Adam aýrýhanaǵa ómirin saqtap qalý úshin keledi. Eger dáriger kómektese almaı qalsa, bir basqa. Biraq klınıka qaýipsizdikke tolyq kepildik berip, ózi shaqyryp operasııa jasaǵanda, jaýapkershilik te ózgeshe», deıdi marqumnyń balasy.
