Bir kúnde 45 júrgizýshi jol erjesin buzdy

Oblys ortalyǵynda jolaýshylardy tasymaldaıtyn avtobýstardy tekserý maqsatynda kólik baqylaý departamentiniń aýmaqtyq bólimsheleri jáne qoǵamdyq baqylaý ókilderiniń qatysýymen jol erejelerin saqtaýdyń «Avtobýs» atty aldyn alý sharasy ótti. Estaı kóshesi boıymen júretin №152, 151, 157,115, 3 shaǵyn kólik avtobýstary óte tar, al jolaýshy kóp. Shaǵyn avtobýstardyń kóbi eski. Keıbiri tipti, ábden tozsa da, adam tasymaldaýǵa shyǵady. Júrgizýshilerdiń densaýlyǵy da, tártipteri de kúmán keltiredi. Asyǵys kelip toqtaıdy, alqyn-julqyn ala jóneledi. Shaǵyn avtobýstar talapqa saı emes. Sondyqtan, polıseıler avtobýs júrgizýshilerin bir kúndik reıd, baqylaýdan soń burynǵy «ádetterine» qaıta baspaıtyndaı qatań talap qoıa bilýleri qajet. Aı saıyn «Avtobýs» sharasy ótip tursa júrgizýshiler de tártipke úırener edi. Bul avtobýsta júretin turǵyndar úshin qaýipsiz bolar edi. Oblystyq ishki ister basqarmasynyń habaryna qaraǵanda, qabyldanǵan sharalar nátıjesinde bir kún ishinde jol-patrýldik polısııa qyzmetkerleri jol júrý erejesin buzǵan 45 avtobýs júrgizýshisin toqtatqan, ıaǵnı, onyń 4-ýi jolaýshylardy tasymaldaý erejesin saqtamaǵan, 11-i uıaly telefon qoldanǵan, 2-ýi jyldamdyqty kóbeıtken kórinedi. Bir kún ishinde emes-aq, bir saǵattyń ishinde jol erejesi tártibin buzýshylar qarasy kóbeıýde. Sondaı-aq, «Avtobýs» jol erejesin buzbaýdyń aldyn alý sharasy kezinde «Folksvagen Kasper» markaly shaǵyn avtobýs júrgizýshisi ustalyp, oǵan ákimshilik hattama toltyryldy. Farıda BYQAI, «Egemen Qazaqstan». PAVLODAR.