Budan týra 25 jyl buryn, 1990 jylǵy 20 naýryz kúni aty álemge máshhúr keńes fýtbolshysy, dańqty qaqpashy Lev Iаshın qaıtys boldy. Ol – Olımpııalyq oıyndardyń jáne Eýropanyń chempıony, KSRO-nyń bes dúrkin chempıony, XX ǵasyrdyń eń úzdik qaqpashysy jáne «Altyn dop» júldesine qol jetkizgen jalǵyz golkıper.
Áıgili darbazashy óziniń sporttyq jolyn 1949 jyly Máskeýdiń «Dınamo» komandasynyń qaqpasyn qorǵaýdan bastady. Ol 1950-1953 jyldary sonymen qatar dınamoshylardyń hokkeı jasaǵy sapynda da oınady. Onda da qaqpany qorǵady. Iаshın sporttyń osy túri boıynsha 1953 jyly tipti KSRO Kýbogyn jeńip alyp, Odaq chempıonatynyń qola júldegeri boldy. Al 1954 jyldyń basynda hokkeıden KSRO quramasy sapyna da shaqyryldy. Biraq osy tusta óziniń kúsh-jigerin endi bir ǵana sport túrine – fýtbolǵa aýdarý jóninde sheshimge kelgen sportshy odan bas tartty. Sodan bastap tek fýtbolmen aınalysqan Lev Iаshın 1971 jyly qolǵabyn shegege ilgenge deıin joǵaryda aıtylǵan ataq-dańqtarynyń bárine osy aralyqta qol jetkizdi.
Ataqty qaqpashy «Dınamo» sapynda bes ret (1954, 1955, 1957, 1959 jáne 1963 jyldar) KSRO chempıony boldy jáne úsh ret KSRO Kýbogyn jeńip aldy. 1954 jyly fýtboldan KSRO quramasyna da shaqyrylǵan ol onda jalpy sany 78 oıyn ótkizdi. Iаshın quramamen birge 1956 jyly Melbýrnda ótken Olımpıadanyń, sosyn 1960 jyly Eýropanyń altyn medalin jeńip aldy.
Lev Iаshın óziniń «Qaqpashynyń jazbalary» (1976 jyl) degen kitabynda: «Sporttyń dańqy meni aınalyp ótti dep shaǵym jasaı almaımyn. Jáne men týraly az da jazylǵan joq. Biraq meniń enshime «qus-adam» nemese «jolbarys-adam» degen sekildi teńeýler tıgen emes. Bul durys ta. Men qubylys sanalatyn adamdar qataryna jatpaımyn. Eshqashan aıaqatyr meni aspanǵa qaraı ala tartqan emes, kerisinshe kezekti dopty qaǵyp alý úshin árbir joly kókke qaraı sekirgenimde, jerdiń tartylys kúshiniń zor ekenin sezinýmen boldym. Eshqashan doptyń ózi kelip, meniń qolǵabyma jabysa salmapty», - dep jazdy.
1963 jyly Lev Iаshın aǵylshyn fýtbolynyń júz jyldyǵyna arnalyp Londondaǵy «Ýemblı» stadıonynda ótkizilgen matchta álem quramasy úshin oınady. Sol kezdesýge qatysqan fransýz fýtbolshysy jáne shabýylshysy Raımon Kopa keıin bylaı dep jazdy: «Lev, shamasy, álem quramasynyń jattyǵýynda barlyq kúshińdi sarqa jumsaýdyń qajet emes ekenin, onyń shoý túrinde ótetinin sezinbegen sııaqty. Álde Odaqta oǵan namysty qoldan bermeý tapsyrylǵan, álde onyń ózi sondaı bolýy kerek. Oıynnyń ózi týraly ne aıtýǵa bolady – ol úshin basty másele qalaı bolǵanda da dop jibermeý boldy jáne ol soǵan qol da jetkizdi».
1971 jylǵy 27 mamyr kúni Máskeýdegi «Lýjnıkı» stadıonynda 103 myń adamnyń qatysýymen Lev Iаshınniń fýtbolmen qoshtasý matchy oınaldy. Bul kezdesýde Máskeý, Kıev, Tbılısı qalalarynyń «Dınamo» klýbynyń oıynshylarynan quralǵan sport qoǵamynyń tańdaýly ujymy álem quramasymen kúsh synasty. Jahan jasaǵy qatarynda Eısebıo, Bobbı Charlton, Gerd Mıýller sekildi juldyzdar alańǵa shyqty. Iаshın kezdesý barysynda alańnan ketip bara jatyp, óziniń qolǵabyn 23 jasar komandalasy Vladımır Pılgýıge tapsyrdy. Kezdesý 2:2 degen sımvoldyq eseppen aıaqtaldy.
Lev Iаshın – kóptegen ǵajaıyp rekordtardyń ıegeri. Ol 22 maýsym boıy (1949-1970 jj.) tek bir ǵana komandanyń – Máskeýdiń «Dınamosynyń» namysyn qorǵady. Iаshın tipti Odaq quramasy quramynda alańǵa shyqqanynda keýdesinde «D» degen jazýy bar jeıde kıip shyǵyp turdy. Ol keńes golkıperleri arasynan júz oıynda birde-bir gol jibermegen birinshi qaqpashy boldy.
