Zeınet jasyndaǵy ardager oıynshylar sap túzegen týrnırdiń ashylý saltanatynda aýdandyq «Dene shynyqtyrýdy jáne sportty damytý ortalyǵynyń» dırektory Gaıdar Muqanqojaev talaı shákirtti bilim nárimen sýsyndatqan Keńesbek Qarsybekulynyń qoǵamdyq jumysta atqarǵan eńbekterine toqtaldy. Sporttyq sharaǵa muryndyq bolǵan baýyrlary men urpaqtaryna alǵys bildirip, qatysýshy komandalarǵa sáttilik tiledi. О́z kezeginde Alǵabas orta mektebiniń dırektory Maqsat Mamaev ta ulaǵatty ustazdyń ónegeli ómiri urpaqqa ónege ekenin atady.
Keńesbek Qarsybekuly bilim salasynda úzilissiz 58 jyl eńbek etip, onyń 35 jylyn mektep basqarý salasyna arnaǵan. Respýblıkalyq gazet-jýrnaldarda shtattan tys tilshi, fototilshi bolyp, esimi elge tanylǵan. «Lenınshil jas», «Qazaqstan muǵalimi», «Qazaqstan mektebi», «Jetisý», «Kommýnızm nury» syndy gazet-jýrnaldarda 100-den asa maqala men ocherkteri jarııalanǵan. Onyń qalamynan bala tárbıesi, aýyl ómiri, eńbek adamdarynyń kelbeti kórinis taýyp, san myńdaǵan oqyrmandarmen qaýyshtyrǵan. Qalamy qarymdy ustaz qoǵamdaǵy asa mańyzdy taqyryptardy qamtyp, qazaq baspasózinde kelisti oı-pikir qalyptastyrdy.
Jarysqa qatysýshy sportshylar jerebe arqyly eki topqa bólinip, baq synady. Týrnır qorytyndysynda 1-oryndy Kegen aýylynyń sportshylary jeńip alsa, 2-oryndy Alǵabastyń ardagerleri ıelendi. Al júldeli 3-oryn Jylysaı aýylynyń komandasyna buıyrdy. Kólbastaý aýylynyń komandasy 4-orynnan kórindi. Budan bólek, úzdik oıynshylarǵa da qurmet kórsetilip, túrli marapat tartý etildi.
Jeńimpazdar men júldegerlerdi ardager-sportshy Ertaı Narynbaev pen Gaıdar Muqanqojaev quttyqtap, «Dene shynyqtyrýdy jáne sportty damytý ortalyǵynyń» dıplomdary, medaldary men kýboktary jáne baǵaly syılyqtarmen marapattady. Ulaǵatty ustazdyń urpaqtary Talǵat Keńesbekuly áýlet atynan jarysqa qatysqan sportshylar men qonaqtarǵa alǵysyn bildirdi.
Almaty oblysy
