Foto: istockphoto.com
Basty jańalyqtardyń biri – tikeleı óndirýshiden satyp alý kóleminiń artýy. Aldaǵy jyly 400-den astam dári-dármek deldaldardyń qatysýynsyz, tikeleı zaýyttardan alynady. Bul kórsetkish ótken jylmen salystyrǵanda 2,7 ese artyq.
Mundaı ósim Densaýlyq saqtaý mınıstriniń №110 buıryǵymen engizilgen jańa satyp alý erejeleriniń arqasynda múmkin boldy. Endi óndirýshilerden tikeleı baǵa usynystaryn suraýǵa basymdyq beriledi. Bul baǵany tómendetýge, satyp alý prosesiniń ashyqtyǵyn arttyrýǵa jáne qunyn qalyptastyrýdy baqylaýdy kúsheıtýge baǵyttalǵan.
«Satyp alý burynǵydaı halyqaralyq uıymdar – BUUDB, IýNISEF jáne STOP TB arqyly júzege asyrylady. Halyqaralyq ınstıtýttar arqyly satyp alynatyn pozısııalardyń sany 87%-ǵa (23-ten 43-ke deıin) ulǵaıdy. Mundaı mehanızm básekege qabiletti álemdik baǵalar esebinen aıtarlyqtaı únemdeýdi qamtamasyz etedi, al bosatylǵan qarajat pasıentterdi qosymsha dári-dármekpen qamtamasyz etýge baǵyttalady», delingen habarlamada.
Satyp alynǵan ónimder Biryńǵaı dıstrıbıýtor qoımalaryna osy jyldyń jeltoqsanynda, al emhanalar men aýrýhanalarǵa 2026 jyldyń qańtarynda jetkizile bastaıdy.
Medısınalyq uıymdarǵa qandaı dári qajet ekenin ataýy, dozasy jáne jetkizý merzimderi boıynsha ótinimder anyqtaıdy. Memlekettik qarajatty tıimdi paıdalaný úshin tikeleı satyp alýǵa basymdyq beriledi.
«2024 jyly satyp alý erejelerine jańa tetik – baǵa usynystaryn suratýdy bekitetin ózgerister engizildi. Osynyń arqasynda óndirýshiler tikeleı satyp alatyn preparattardyń sany 2025 jylǵy naýqanmen salystyrǵanda 5 eseden astam ósti», dep habarlady mınıstrliktiń baspasóz qyzmeti.
Ashyqtyqty saqtaý úshin barlyq satyp alý habarlamalary «SK-Farmasııa» saıtynda jarııalanady. Sondaı-aq, jetkizýshilermen belsendi kelissózder júrgizilip, baǵa taldaýy jasalady. 2025 jylǵy satyp alý nátıjesinde memleket 70 mlrd teńgeden astam qarajat únemdegen.
Halyqty dárimen úzdiksiz qamtý úshin 2027 jylǵa arnalǵan satyp alý jumystary 2026 jyldyń mamyrynda bastalmaq.
