Úmit Shaıahmetovanyń pikirinshe, jeke mamandandyrylǵan agrobank qurýdyń mańyzy joq, sebebi elde osyǵan uqsas qarjy ınstıtýttary bolǵan, biraq olar bankrottyqqa ushyrady.
«Búginde naryqta Qazaqstannyń Damý banki men «Otbasy banki» jumys isteıdi. Bireýi ıpoteka beredi, ekinshisi zańdy tulǵalarmen jumys isteıdi. Meniń oıymsha, bul jetkilikti. Oǵan qosa, aýyl sharýashylyǵy men agroónerkásiptik keshen sektorynda jumys isteıtin túrli ınstıtýttar óte kóp, olar – Agrarlyq nesıe korporasııasy, «Agrolızıng», memlekettik «Azyq-túlik korporasııasy», jergilikti basqarý organdary jáne basqalar», – deıdi Halyk Bank basshysy.
Aýyl sharýashylyǵyn qarjylandyratyn bank qurý tájirıbesi kórshiles elderde bar. Reseıde «Rosselhozbank» ShOB-qa 3-7%-ben nesıe beredi. 1953 jyly Qytaıda 320 mln klıentke qyzmet kórsetetin The Agricultural Bank of China mamandandyrylǵan aýyl sharýashylyǵy banki quryldy. Bul bank aktıvteri boıynsha Qytaıdyń bank júıesinde tórtinshi jáne taza paıdasy boıynsha jetinshi orynda. Qyrǵyzstanda agrosektordy damytý jónindegi memlekettik baǵdarlamalardy iske asyratyn, eldiń iri qarjy ınstıtýttarynyń biri «Aýyl Banki» bar.
Qarjyger Beısenbek Zııabekovtyń aıtýynsha, otandyq bank sektory áli kúnge deıin memlekettik kómekke súıenip otyr. Onyń aıtýynsha, ekonomıkadaǵy memlekettiń joǵary úlesi bank sektoryna da áser etedi. Kóshbasshy pozısııaǵa úmitker kez kelgen bank is júzinde memlekettik sektordyń aqshasyna táýeldi jáne úkimettik baǵdarlamalarǵa qatysady. Bizdiń elde birer bankten ózge bankterdiń bári memlekettik aqshaǵa táýeldi. Eger memleket myna bankti bankrot etý kerek dep sheshse, ony bir buıryqpen bankrotqa jibere alady.
