Bul fotosýretti Kókpekti aýdandyq ólketaný mýzeıinen kórip qaldyq. Ádette mundaı patsha zamanyndaǵy kóne sýrettegi dala shonjarlarynyń aty-jóni tolyqtaı anyqtalmaı jatatyn. Al munda bári naqty jazylypty.
Soldan ońǵa qaraı birinshi qatarda: bolystyń uly Ybyraı Sáttibaev, sultan ári bolys Jeńis Ibragımov, Kókpekti orys-qazaq mektebiniń oqýshysy Tashkenbaı Juqyshev, naıman-sarjomarttyń aǵa sultany Álıhan Tileýberdınniń (ober-ofıser) uly Islam Álıhanov, bı Jaǵybaı Dolanov beınelengen. Ekinshi qatarda: О́skemen ýezi bastyǵynyń kishi kómekshisi, horýnjıı Quleke Shyńǵysov, Tarbaǵataı bolysy Butabaıdyń jibergen adamy Botabaı Segizbaev, Tarbaǵataı eliniń jaqsysy Tógis Shaıanbaev, Kendirlik bolysynan shyqqan tóre Jansultan Jamantaev, tóre Muqamedsultan Daıyrov, Zaısan prıstavy maıor Tıhonov, sondaı-aq qarakereı qojambet rýynyń bıi Qojamjar Jaıyqov otyr. Úshinshi qatarda: tilmash Esaýl Vlasov, tórtýyl Qara Ertis eliniń bolysy Máz Boqatov, bolys Dosqan Maıkótov, Shilikti bolysynyń bıi Májıt Monkın, patsha ákimshiliginiń sheneýnigi Krasılnıkov, Kókpekti orys-qazaq mektebiniń oqýshysy Bıleýshi Bosqynbaev, Arǵanaty bolystyǵyna kandıdat Myrzahan Montın bar.
Sýret patshalyq Reseıdiń ortalyǵy Sankt-Peterbýrg qalasynda 1873 jyldyń qańtar aıynda túsirilgen. Túsirgen – fotograf Lorens.
Tarıhshylardyń málimetinshe, Semeı gýbernııasynyń aýmaǵyndaǵy Zaısan, Tarbaǵataı, Kókpekti óńirlerinen 18 adamnan turatyn delegasııa 1873 jyldyń qańtarynda Sankt-Peterbýrgke baryp, ımperator II Aleksandr qabyldaýynda bolady. Bir qyzyǵy, baryn kıinip, baqanyn qolyna ustap barǵan dala shonjarlarynyń kıim kıisi, júris-turysy Peterbýrg jurtshylyǵyn tańdandyrǵan kórinedi. Sóıtip, bul sapar handyq bıliktiń derbestigi joıylǵannan keıingi qazaq elıtasynyń patsha ókimetiniń saıası júıesine beıimdelý kezeńiniń bir belgisi bolyp taspalanǵan.
Abaı oblysy
