Elbasy «NurOtan» partııasynyń Saıası keńesiniń Bıýro otyrysyna qatysty

ASTANA. 8 tamyz. Memleket basshysy «Nur Otan» partııasy Saıası keńesiniń Bıýro otyrysyna qatysty. Bul týraly akorda.kz habarlady. Otyrys barysynda Elbasy úlken jumys atqarǵany úshin Baýyrjan Baıbekke alǵys aıtty jáne partııa Tóraǵasynyń jańa birinshi orynbasary Asqar Myrzahmetovti tanystyrdy. Qazaqstan Prezıdenti «Nur Otan» partııasy músheleriniń yntymaqty jumysy arqasynda onyń saılaýaldy tuǵyrnamasynyń 70 paıyzy oryndalǵanyn, basqa baǵyttar boıynsha belsendi jumys júrgizilip jatqanyn aıtty. «Parlamenttegi fraksııa biz júzege asyryp jatqan barlyq baǵdarlamalardy zańnamalyq turǵydan nyǵaıtýdy qamtamasyz etip otyr. Partııa azamattyq qoǵammen keń aýqymdy dıalogty jolǵa qoıdy. Onyń bastamasymen qurylǵan «Qazaqstan-2050»  jalpyulttyq demokratııalyq kúshter koalısııasy bizdiń qoǵamdy uıystyratyn alańǵa aınaldy, bul jumysty jalǵastyrý qajet. Partııanyń qoǵamdyq qabyldaýlary  halyqpen  keri baılanysty tıimdi qamtamasyz etýde. Internettegi, sonyń ishinde alǵash ret engizilgen «elektrondy partııa» arqyly jumys kúsheıdi. Sondaı-aq, «Jas Otan» jastar qanatynyń jańa baǵdarlamasynyń qabyldanýymen birge jastarmen jumys jańa sapaly deńgeıge shyqty», – dedi Nursultan Nazarbaev. Nursultan Nazarbaev birtindep ortalyqsyzdandyrý jáne ókilettikterdi jergilikti jerlerge berý jaǵdaıynda partııanyń óńirlerdi basqarý tájirıbesi bar kadrlarǵa zárýligi arta túsetinin aıtty. Sonymen qatar, Qazaqstan Prezıdenti qazirgi ýaqytta jetekshi ári búkil halyq aldyndaǵy jaýapty saıası kúsh retinde «Nur Otan» partııasynyń aldynda  asa mańyzdy mindetter turǵanyn atap kórsetti. Sonyń birinshisi qazaqstandyqtardy Bes ınstıtýsıonaldyq reformany jáne «100 naqty qadam» Ult josparyn júzege asyrýǵa jumyldyrý bolyp tabylady. «Jańǵyrtý jumystary kúrdeli jaǵdaıda ótip jatyr. Bizdiń eksporttyq taýarlarymyzdyń baǵasy aıtarlyqtaı tómendep, bıýdjet aqshasy azaıýda. Sondyqten men Úkimetke jáne barlyq ákimderge halyq aldyndaǵy barlyq áleýmettik mindettemelerdi oryndaýǵa bıýdjette qajetti qarajat bolýyn qamtamasyz etý úshin qarjyny qatań únemdeýdi tapsyrdym. El arasynda da tıisti túsindirý jumystaryn júrgizgen jón», – dep atap ótti Nursultan Nazarbaev. Sondaı-aq, Qazaqstan Prezıdenti «Nurly jol» baǵdarlamasynyń júzege asyrylý barysyn tıimdi baqylaýdy qamtamasyz etýdi tapsyrdy. «Biz qabyldaǵan osy jáne basqa baǵdarlamalar der kezinde jasalǵan, ony túsindirý qajet. «Nurly jol» baǵdarlamasyn júzege asyrýǵa keıbir iri kásiporyndardan bosaýǵa májbúr bolǵan adamdardy tartý kerek. Bul barsha ákimderdiń mindeti, buǵan qajetti aqsha bólingen, barlyq jerde avtomobıl joldaryn, aýrýhana, mektep, baspana, TKSh nysandaryn jóndeý jáne salýdy qamtıtyn jumystar barshylyq», – dep atap ótti Memleket basshysy. Nursultan Nazarbaev partııanyń qoǵamdaǵy birlik pen kelisimdi saqtaýǵa yqpal etip, barlyq týyndaıtyn máseleler boıynsha halyqpen belsendi jumys isteýi tıistigine nazar aýdardy. Sonymen qatar, Qazaqstan Prezıdenti partııaǵa kelesi jyly bolatyn jáne kúrdeli ekonomıkalyq jaǵdaıda ótetin Parlament saılaýy jónindegi naýqanǵa daıyndyqty qazirden bastaý kerektigin atap aıtty. Sońynda Memleket basshysy Prezıdent Ákimshiligi, Úkimet, «Nur Otan» jáne onyń Parlamenttegi fraksııasynyń úılesimdi jumys júrgizýi qajettigin ataı otyryp, Asqar Myrzahmetovke belsene jumys isteý kerektigin aıtty. Talǵat Raıymbek. Derek, sýret: akorda.kz.