Foto: atameken.kz
ShQO Kásipkerler palatasyna óńirdegi birneshe stomatologııalyq klınıka júgingen. Bıznes ókilderi Qordyń jyldar boıy qoldanystaǵy kelisimsharttar men tarıfter boıynsha tólenip kelgen anestezııa qyzmetterin kenetten «qosarlanǵan tólem» dep tanyp, talap qoıa bastaǵanyn habarlaǵan.
Kásipkerler palatasy klınıkalardyń ótinishterin muqııat qarap, normatıvtik aktilerdi jáne sot materıaldaryn zerttedi, sebebi mundaı talaptar óńirdegi búkil stomatologııalyq sektor úshin táýekeldi jaǵdaılardy týdyrǵan.
Áleýmettik medısınalyq saqtandyrý qory anestezııa qyzmetteri negizsiz tólemge qoıyldy dep eseptep, kompanııadan 16,5 mln teńge óndirip alýdy talap etken, sonymen qatar:
- qyzmetter 2023 jylǵa arnalǵan qoldanystaǵy kelisimshart aıasynda kórsetilgen;
- oryndalǵan jumys aktileri eki tarappen de qol qoıylǵan;
- Qor 2021, 2022, 2023, 2024 jyldary kórsetilgen qyzmetterdi qabyldap, tólegen;
- talapker silteme jasaǵan Densaýlyq saqtaý mınıstrliginiń túsindirmeleri resmı normatıvtik túsindirý mártebesine ıe emes.
«Atameken» Ulttyq kásipkerler palatasynyń (UQP) baspasóz qyzmetiniń habarlaýynsha, Apellıasııalyq alqa birinshi ınstansııa sotynyń quqyq normalaryn durys qoldanbaǵanyn jáne talap qoıý sheginen shyǵyp ketkenin anyqtady. Sottyń negizgi tujyrymy: qoldanystaǵy kelisimshart bolǵan kezde daýdy «negizsiz baıytý» retinde qarastyrýǵa bolmaıdy. Mundaı jaǵdaılarda talapker «negizsiz baıytý» emes, zalaldy óndirý týraly talap qoıýy tıis.
Osylaısha, sot 16 mln teńgeni óndirip alý úshin quqyqtyq negiz bolmaǵanyn moıyndap otyr.
ShQO Kásipkerler palatasy atap ótkendeı, oblystyq sottyń bul sheshimi MÁMS júıesinde jumys isteıtin barlyq medısınalyq uıymdar úshin mańyzdy. Ol kelesilerdi rastaıdy: kelisimshart talaptaryn eki taraptyń da mindetti túrde saqtaýy; quqyqtyq negizsiz talap qoıýǵa jol berilmeýi; tarıftik ádistemeler men Densaýlyq saqtaý mınıstrliginiń normatıvtik aktilerin qatań saqtaý qajettiligi.
«Mundaı daýlar bıznesti belgisizdik pen qarjylyq táýekel jaǵdaıynda qaldyrmaýy tıis. Kásipkerler memlekettik tapsyrys júıesiniń ashyqtyǵyna jáne boljamdylyǵyna senimdi bolýy qajet», dedi ShQO Kásipkerler palatasynyń quqyqtyq máseleler jónindegi dırektordyń orynbasary Aıjan Jáńgirhanova.
Shyǵys Qazaqstan oblysynyń Kásipkerler palatasy medısınalyq uıymdardyń ótinishterin ári qaraı da qaraıdy jáne MÁMS salasyndaǵy quqyq qoldaný praktıkasyn baqylaýdy jalǵastyrady. Uqsas talaptarmen betpe-bet kelgen barlyq klınıkalar keńes pen quqyqtyq qoldaý úshin Palataǵa júgine alady.
