Bıylǵy forým Keńestiń on jyldyq qyzmetine arnaldy. Is-sharaǵa jetekshi qurylys kompanııalary, developerler, sáýletshiler, halyqaralyq uıymdar, qarjy ınstıtýttary men joǵary oqý oryndary ókilderi qatysty. Júzden astam kásibı maman jınalǵan alań óńirdegi jasyl qurylys salasynyń áleýetin talqylaıtyn iri platformaǵa aınaldy.
KazGBC on jylda turaqty qurylys mádenıetin damytýda aıtarlyqtaı nátıjege qol jetkizdi. Energııa tıimdiligi, resýrstardy únemdeý men ekologııalyq talaptardy engizý jónindegi bastamalar salanyń jańa standartyn qalyptastyrýǵa yqpal etti.
Otandyq OMIR ádistemesi osy jumystyń basty jemisiniń biri bolyp otyr. Qazir jalpy aýdany 5 mln sharshy metrge jýyq 150-den astam nysan OMIR sertıfıkatyn alǵan. Aıta keterligi, ádisteme tek ózimizde ǵana emes, óńir elderinde de qoldanylyp, Ázerbaıjannyń jasyl qurylys standartynyń negizi bola aldy.
Jańa tehnologııalar men trendter
Forýmda salanyń ózekti baǵyttary – ınnovasııalyq qurylys materıaldary, sıfrlandyrý, jasyl jobalardy qarjylandyrý mehanızmderi, jańa býyn mamandaryn daıarlaý sııaqty máseleler taldandy.
Spıkerler qatarynda KazGBC ókilderi Danııar Azymhanov, Aıman Shopaeva, Aleksandr Belyı, sondaı-aq Ázerbaıjan Jasyl qurylys keńesiniń dırektory Fýad Bagırov pen qurylys materıaldaryn sertıfıkattaý jónindegi sarapshy Vıktorııa Glýshenko boldy. Is-sharaǵa Azııa damý banki, BI Group, Bazis A, Sat NS, Otbasy bank, Satbayev University jáne EUÝ sııaqty uıymdar qatysty.
Igi is-sharanyń mańyzdy sátteriniń biri jasyl qurylys salasyndaǵy úzdik jobalar men kompanııalardy marapattaıtyn Green Awards rásimi boldy. Marapat ıegerleri qatarynda Sat NS, OKS Group, Kanfar Building, ADB, Nur Astana qurylys, Nest Stroy, Satbayev University, «Ergonomıka» ǵylymı-óndiristik fırmasy jáne basqa uıymdar bar.
KazGBC dırektory Danııar Azymhanov on jyldaǵy qıyndyqtar men jetistikterge toqtalyp, «turaqty ári damýshy júıe qalyptastyrý – búkil komandanyń eńbegi» ekenin aıtty. Al atqarýshy dırektor Aleksandr Belyı «Qazaqstan naryǵy ekologııalyq transformasııaǵa daıyn, jasyl qurylys ekonomıkalyq ósimge de, básekege qabilettilikke de áser etetin faktorǵa aınaldy» dedi.
Ázerbaıjan Jasyl qurylys keńesiniń dırektory Fýad Bagırov Ortalyq Azııa – Kaspıı – Kavkaz aımaǵyndaǵy seriktestik jasyl qurylys boıynsha birlesken jobalar ázirleýge múmkindik beretinin atap ótti. Onyń aıtýynsha, KazGBC óńirdiń jasyl qurylys trendterin qalyptastyryp, kórshi elder úshin tájirıbe ortalyǵyna aınalyp otyr.
Qazaqstan – óńirlik jasyl qurylys ortalyǵy
Green Build Central Asia 2025 forýmy tájirıbe almasýdyń, kásibı baılanys pen birlesken jobalardy bastaýǵa arnalǵan alańnyń mańyzyn kórsetti. Praktıkalyq sheshimderdiń tanystyrylýy, OMIR ádistemesin jetildirý baǵyttarynyń belgilenýi men úzdik kompanııalardy marapattaý elimizdiń jasyl qurylys boıynsha óńirlik kóshbasshy retinde ornyǵa túskenin dáleldeıdi.
KazGBC forýmnyń qorytyndysynda «On jylda turaqty qurylys ıdeıalaryn naryq damýynyń bir bóligine aınaldyrdyq. Búginde elimiz Ortalyq Azııadaǵy jasyl qurylys kóshbasshysy bolýǵa tolyq múmkindigi bar», degen tujyrym aıtyldy.
Bul forým turaqty ınfraqurylym qurýǵa baǵyttalǵan jańa jobalarǵa jol ashyp, eldiń jasyl ekonomıkaǵa kóshýindegi mańyzdy qadamdardyń biri boldy.
