Ol oblys ortalyǵynyń irgesindegi Kenjekól aýylynda 18 jyldan beri turyp jatyr. Aıtýynsha, Reseıdiń Novosibir ólkesinde 1977 jyly dúnıege kelgen. Taǵdyrdyń jazýymen ol úsh jasqa tolǵanda otbasy Pavlodar qalasynyń janyndaǵy Mıchýrıno aýylyna kóship keledi. Balalyq shaǵyn osynda ótkizgen Andreı Dıagel qyzyq bolǵanda keńestik úlgidegi tólqujatty da ala almaǵan. Oǵan týý týraly kýáligin joǵaltyp alýy sebep bolǵan.
– Mektep bitirgen soń Pavlodar qalasyna kelip, páter jaldap turdym. Qolǵa ilikkken jumystyń bárin isteı berdim. Qujatym joqtyǵyna baılanysty áskerge barmadym. Al 2007 jyly Kenjekól aýylyna kóship, ol jerde bolashaq jarymmen tanystym. Tuńǵysh qyzymyz da sonda dúnıege keldi. Áıelimiz ekeýimiz nekemizdi zańdastyrǵymyz-aq kelgen. Alaıda ol úshin áýeli jeke kýálik nemese tólqujat resimdeýim kerek boldy. Biraq ony resimdeý uzaq jyldarǵa sozyldy, – deıdi ol.
Andreı óz erkimen eki márte oblys ortalyǵyndaǵy panasyz jandarǵa arnalǵan arnaıy qabyldaǵyshqa baryp, 30 táýlikten otyryp qaıtqan.
– Solaı jasasam, qujatym tez arada resimdelip kete me dep oıladym. Biraq bári men oılaǵandaı bolmaı shyqty. Reseılik azamat emes ekenimdi, 30 jyldan astam ýaqyt jyl boıy Pavlodar irgesinde turyp kele jatqanymdy dáleldeýim qajet boldy. Osylaı júrgende 2018 jyly jergilikti ýchaskelik polıseı Reseıdiń Qarasýyq qalasynan týý týraly kýáligimniń kóshirmesin aldyrdy. Odan soń arnaıy qabyldaǵyshta taǵy otyryp shyqty. Odan da nátıje bolmady, – dep eske alady otaǵasy.
Birde áıeli emdelip jatqan medısınalyq ortalyqqa barǵanda ondaǵylar memlekettik málimetter qorynda Andreı Dıagel týraly birde-bir málimet joq ekenin habarlaıdy. Bul jaǵdaı qujat resimdeý isine bar ynta-shyntasymen kirisýge túrtki bolǵan tárizdi. Aqpan aıynda jergilikti ákimdik ókilderi qujat jınaýǵa kómektesip, onyń kórshilerin kýáger retinde tartqan. Iаǵnı osynshama ýaqyt ishinde er adamnyń rasynda oblys aýmaǵyn mekendep kelgenin, eshqaıda shyqpaǵanyn dáleldeý qajet edi.
Kýágerler barlyǵyn naqtylaǵan soń sáýir aıynda óńirlik kóshi-qon qyzmeti basqarmasy Andreı Dıageldi Qazaqstannyń azamaty dep tanydy. Al mamyr aıynda oǵan JSN berildi. Nátıjesinde QR azamattaryna arnalǵan jeke kýálik resimdeýge múmkindik alady.
– Bıylǵy 17 qarashada kópten arman bolǵan kýáligim qolyma tıdi. Bes balam bar, eń kishi ulym 6 aıǵa toldy. Olardyń barlyǵy kezinde áıelimniń tegin alǵan. Endi balalarymdy óz tegime jazdyryp alamyn, – degen qýanyshyn jetkizdi otaǵasy.
Andreı ómir boıy kafel jelimdeýmen aınalysyp kelgen. Osy ýaqytqa deıin jumys usynǵan azamattar odan eshbir qujat surap kórmegen.
Pavlodar oblysy
