Foto: Ashyq derekkózden
Polısııa qyzmetkerleri úsh kún ishinde mal tasymaldaǵan 12 myńnan astam kólikti, 3,5 myńnan asa satyp alý oryndary men 8 myń sharýa qojalyq pen fermany tekserdi.
Nátıjesinde Astana men Almaty qalalarynda alty zańsyz mal soıý sehy, elorda bazarlarynyń birinde et satýǵa arnalǵan jalǵan mór qoldaný faktisi anyqtaldy.
Jedel ashylǵan 107 mal urlyǵy faktisiniń arqasynda 800-den astam mal ıelerine qaıtaryldy.
«Pavlodar oblysynda alty epızod boıynsha 43 bas iri qara maldy urlaǵan tórt adamnan quralǵan top ustaldy. Jetisý oblysynda da 50 bas iri qaranyń urlyǵyna qatysy bar tórt adamnan turatyn top anyqtalyp, qylmys der kezinde toqtatyldy. Aqtóbe oblysynda polıseıler jaıylymda joǵalǵan 20 jylqyny taýyp, ıelerine qaıtaryp berdi», dedi IIM krımınaldyq polısııa departamentiniń basqarma bastyǵy Jandos Muhatov.
IIM sharýalarǵa mal basyn tańbalap, tórt túlik joǵalǵan jaǵdaıda ýaqyt ozdyrmaı polısııaǵa habarlaýǵa keńes berip otyr.
