Foto ashyq derekkóz
Bul týraly ol Ońtústik Afrıkadaǵy G20 sammıtinen keıin ótken baspasóz máslıhatynda aıtty.
«Osy aptada men Zelenskıımen kezdestim, al erteń Pýtınmen telefon arqyly sóılesemin. Biz beıbit ómir úshin ynta-shyntamyzdy jumsap kelemiz hám oǵan qol jetkizemiz», dedi Erdoǵan.
Al TRT telarnasy taratqandaı aqparatqa saı, túrik basshysy G20 sammıti aıasynda Fransııa prezıdenti Emmanýel Makronmen kezdesýde Reseı men Ýkraına arasyndaǵy soǵys ádil ári turaqty beıbit kelisimmen aıaqtalýy tıis ekenin atap ótti.
«Erdoǵan barlyq dıplomatııalyq tetikterdi paıdalaný qajettigin aıtty jáne Túrkııa kelissózder júrgizýge qolaıly jaǵdaı qalyptastyrý baǵytyndaǵy jumystaryn jalǵastyryp jatqanyn rastady», delingen materıalda.
Reseılik aqparat quraldarynyń málimetinshe, Reseı Prezıdentiniń baspasóz hatshysy Dmıtrıı Peskov ta eki el basshylarynyń dúısenbi kúni telefon arqyly sóılesetinin rastady.
Eske sala keteıik, Vladımır Zelenskıımen Ankarada ótken kelissózderdiń qorytyndysyna sáıkes Erdoǵan Máskeý men Kıev arasyndaǵy Stambýlda bastalǵan kelissózderdi qaıta jalǵastyrýǵa jáne olardyń taqyryptyq aıasyn keńeıtýge shaqyrǵan bolatyn. Ol Túrkııa Ýkraınanyń jáne Reseıdiń qatysýymen bolǵan úsh raýnd «beıbit kelissózderdi» qabyldaǵanyn, sol kezdesýlerde ásirese gýmanıtarlyq máseleler boıynsha belgili bir progress bolǵanyn atap ótti.
О́z kezeginde Zelenskıı Kıev úshin Túrkııanyń ustanymy aıryqsha mańyzdy ekenin aıtyp, Ýkraına táýelsizdigi men egemendigin qoldaǵany úshin alǵys bildirdi.
